Amed de ciwanî komelêka bi nameye GÎB-DER’î siba akenê. Endamê GÎB-DER’î Hasan Karsuyî dîyar kerd ke komunê azadî prototîpê komelê newe yê û veng da heme ciwanan ke vera polîtîkayanê şerê taybetî, tewrê munaqeşayanê awankerdişê cuyêka newe bibê.
Amed de xebatê ciwanan ê awankerdişê komele, komun û meclîsanê newe dewam kenê. Înan ra yew zî Komela Seba Ameyoxî Ma Tîya de yê (GÎB-DER) ya. GÎB-DER do bi sloganê “Kokê ma xorîn, ameyoxê ma bi hêvî, ciwanan reyde ver bi komelêko azad” siba (23 Gulane) saete 17:00î de Parqa Eyşe Şane ya qezaya Rezan a Amedî de bi şayîye bêro akerdene.
Programê akerdişî de do Kolektîfê Rîtmanê Azadan, Kadîr Çat û Gerok Ma ca bigêrê. Komele do Atolyeyanê sey Teknolojî, Ekolojî, Weşîye, Spor, Ekonomîyê Huqûqî û Cebîrî bi Kurdkî organîze bikera û kursanê Kurdkî, setrenc, matematîkî bi kurmancî bida û seba gedeyan dersanê komputere û teknolojî bida. Endamê Komîsyonê Weşîye yê GÎB-DER’î Hasan Karsuyî derheqê amanc û muhîmîya nê xebatan û modele komunalî de veng da heme ciwanan ke vera polîtîkayanê şerê taybetî têkoşînanê girdan bikerê û tewrê munaqeşayanê awankerdişê cuyêka newe bibê.
‘Prototîpê komelê azad komun ê’
Hasan Karsuyî destpêkê qiseykerdişê xo de bale ant rolê komunan ê komelî ser o û dîyar kerd ke komunî seba înan bingeyê komelî yê. Hasan Karsuyî îfade kerd ke dewlete keyeyî sey prototîpê xo vînena, labelê prototîpê komelê azadî komunê înan bi xo yê û dîyar kerd ke awankerdişê komelêko azad tena bi awankerdişê komunanê azadan mumkin o.
‘Mîrasêko ke tarîxî ey reseno 10 hezar serran ra ver’
Hasan Karsuyî bale ant modelê komunalî ser o û wina vat: “Kulturî komunalî ke tarîxî ey reseno 10 hezaran serrî ra ver, mîrasêko ke ganî bêro pawitene û neqlê ameyoxî bibo. Ma wazenê warê ekonomî, weşîye, huqûq, spor, ekolojî û heqanê cinîyan de dînamîkê komelî bi destê ciwanan bêro averberdene. Her çend nê xebatî ewil şaristanan de dest pêkerdbî zî amancê înan o ewilin o yo ke nê modelî berê heme dewan, taxan û kuçeyan.”
Têkoşînê vera polîtîkayanê şerê taybetî
Hasan Karsuyî bale ant polîtîkayanê ke Kurdîstanî de bi taybetî ciwanan ser o yenê rayraberdene ser o û îfade kerd ke amancê înan o verên puçkerdişê şerê taybet o û wina dewam kerd: “Ewro mîyanê şaristanan de madeyê hişberî, fuhuş û çetebîyayîş bi destê hêzanê çekdaran yenê organîzekerdene û no çî sey şerê teybet yeno rayraberdene. Ma wazenê vera nê şerî vinderê û şarê ma ganî seba xo bibo îrade, seba ke na îrade zana do çi awan bikera û probleman senî çareser bikera.”
Seba akerdişê GÎB-DER’î vengdayîş
Hasan Karsuyî peynîya qiseykerdişê xo de seba beşdarbîyayîşê programê akerdişî yê komele veng da û vat: “Sazgehe aîdê kesêkî yan zî sîstemêkî nîya, sazgehe ya heme ciwananê Amed û Kurdîstanî ya. Siba saete 17:00î de Parqa Eyşe Şane do komela ma bêra akerdene. Heme ciwanî wa bêrê, kêmanîyan ser o muanqeşa bikerê ke bivînê eşkenê çi awan bikerê.”
