Şarê herêma Cizîr û Kobanî yê Rojavayê Kurdîstanî, roja yewine yê Roşanê Qurbanî de badê nimajê roşanî bi girseyî verê da mezelê şehîdan. Fermandarîya Pêroyî ya YPJ’yî bi munasebeta roşanî mesajêk weşana û sozê girdkerdişê têkoşînî da, Walîyê Hesekê Nûredîn Ehmed şarê şaristanê Qamişlo reyde nimajê roşanî kerd.
Rojavayê Kurdîstanî Roşanê Qurbanî bi zîyaretê mezelê şehîdan dest pêkerd. Sey tradîsyonêke her roşanî, pêroyî şaristanê herêma Cizîre û Kobanî, şarê Rojavayê Kurdîstanî bi qefleyan zîyaretê ca û warê qehremanan kerd û roşanê şehîdan pîroz kerd. Qamişlo de şarî verê xo da Pakrewangehê Şehîd Delîl Saroxan. Dêrike de zîyaretê Pakrewangehê Şehîd Xebat dêrik û Tirbesîye de zî Pakrewangehê Şehîd Dilşêr ame zîyaret kerdene. Amûde de şar şî zîyaretê Pakrewangehê şehîd Îsmaîl Hogir.
Şehîdgeh de roşanê yewbînî pîroz kerd
Hesekê de keyeyê şehîdan û şar şî Pakrewangehê Şehîd Dijwar ê dewa Dawidîye. Dirbêsîye de welatijî Pakrewangehê Şehîd Rustem Cudî yê dewa Berkevir de kom bî. Sewbîna Til Temir de zîyaretê Pakrewangehê Şehîdê Til Temirî ame kerdene. Kobanî de zî bi hezaran şarê herême verê xo da Pakrewangehê Şehîd Dîcle. Welatijan pakrewangeh de roşanê yewbînî pîroz kerd. welatijan gorê şehîdan û gorê merdimanê xo zîyaret kerd, înan rê duayî kerdî û erjê şorişî vîr ardî.
Walî Nûredîn Ehmedî şehîdgeh zîyaret kerd
Walîyê Hesekê Nûredîn Ehmedî şênî û rîsipîyê şaristanî reyde Qamişlo de nimajê roşanî kerd. Nûredîn Ehmedî badê nimajî, roşanê şarî pîroz kerd û verê da Pakrewangehê Şehîd Delîl Saroxan.
YPJ: Ma seba azadî têkoşîn danê
Bi munasebetê Roşanê Qurbanî, Fermandarîya Pêroyî ya Yewîneyanê pawitişê Cinîyan (YPJ) zî mesajêke weşana. YPJ’yî mesajê xo de bale ante serê muhîmîya têkoşînî û wina dewam kerd: “Ma Roşanê Qurbanî serê de keyeyê şehîdanê xo yê qehreman, keyeyanê fedakar ê esîranê şerî ke bi hêvî û rûmet ma paweyê, şarê xo yê xoverdayox, pêroyî şarê Sûrîya û heme şervananê ke çeperê rûmetî pawenê, pîroz kenê. Roşan seba ma manaya parekerdene, yewîye û xurtkerdişê têkoşînî yo. Ma sozê xo tekrar kenê ke ma do seba azadîya heme esîranê xo û pawitişê welatî, destkewteyê şorişî û azadîya cinîyan têkoşîn bidê. Roşanê şima pîroz bo, wa her roja şima azadî bo.”
