Hemşaredara Şaristanê Girdî ya Wanî Neslîhan Şedal û Hemşaredara Êlihî Gulîstan Sonuk konferansê Cinîyan ê Rayberîya Herêmî yo Demokratîk de qisey kerd û vat: “Tayînkerdişê qeyûman ne bi kesan rê girêdayeyo, ne bi hemserekê weçîniteyî rê girêdayeyo, rasterast hêrişê îradeyê cinîyan û îradeyê şarê kurdî ser o yo. Ganî îradeyê cinîyan û komelî bêro naskerdene.”
Konferansê Cinîyan ê Rayberîya Herêmî yo Demokratîk bi sloganê “Bi îradeyê cinîyan ma benê komun, bi rayberîya herêmî komelo azad mûnenê” Salona Alî Emîrî ya Şaredarîya Amedî ya Şaristanê Girdî de dest pêkerd. Konferanso ke do 4 rojî dewam bikero; roja yewine bi cinî, hemşaredar, sîyasetmedaran dewam bikero û di rojê peyînî zî do pêroyî dewam bikero. Roja yewine de cinî, bi kincanê xo yê kurdkî beşdarê konferansî bî, dîmenê rengînî vejîyê werte.
‘Destkewteyanê cinîyan binpay kenê û tasfîye kenê’
Neslîhan Şedal dîyar kerd paradîgmaya cuya komelkî û sîstemê hemserektî, mekanîzmayanê rayberîye de alternatîfêka azadîwaz û seyyewbînîwaz a. Neslîhan Şedal vat, hişmendîyê îqtîdarî ke bi serrano heq û deskewteyanê şarî kurdî hedef girewto, ewro zî wazeno bi qeyûman hewl bido ke nê destkewteyan bipelçiqno û şaredarîyê ke şarê kurdî û hêzanê demokratîkwazan qezanc kerdê, bi hawayêko îşgalkar destser bikero.
‘Ma do rêxistinanê xo mîyanê komelî de xurtêr bikerê’
Neslîhan Şedal îfade kerd ke kar û destkewteyê cinîyan ser o hêrişê giranî estê û vat ke heq û destkewteyê cinîyan yenê tasfîyekerdene, tada vera cinîyan, xizanî û qirkerdişê ekolojîye zî roj bi roj zêde beno. Neslîhan Şedal vat ke têkoşînê înan vera nê polîtîkayan dewam kenê û pawitişê paradîgmaya demokratîk-ekolojîk ya bingeyê azadîya cinîyan ser o lazim a. Neslîhan Şedal ard ziwan ke nê qonaxî de naskerdişê îradeyê cinîyan, pawitişê destkewteyê înan, zêdekerdişê destkewteyan û xurtkerdişê rêxistinbîyayîşî babeta bingeyîn ê konferansî yo.
Binpaykerdişê îradeyê cinî û komelî
Gulîstan Sonuk diyar kerd ke her çiqas aye 2 serrî verê ameybî weçînitîş, la xeylî şaredarîyê înan hetê qayûmî ra ameybî destserkerdiş. Gulîstan Sonuk vat ke no ne raya ewîlin a ke îradeyê şarî kurdî û cinîyan yeno binpaykerdene û prosesê ke çareserî, dîyalog û aştî yenê nîqaşkerdene de dewamkerdişê polîtîkayê qeyûmî nênê qebûlkerdiş. Vat ke qeyûm rasterast hêrişêko îradeyê şarî kurdî û cinîyan o û komel nê çî sey nizdîbîyayêşêko ne cidî yê dewlete û AKP’yî erjneno.
‘Demokrasîyê herêmî ganî bêro naskerdene û hîrakerdene’
Gulîstan Sonuk îfade kerd ke seba aştîyêka domdare ganî dewlete bi Kurdîstanî rê pê bikera û demokrasîyê herêmî bêro naskerdene û hîrakerdene. Gulîstan Sonuk ard ziwan ke konferans seba erjnayîşê xebatanê 2 serranê peyînan, vînayîşê kêmanîyan û dîyarkerdişê perspektîf û pêşnîyazanê ameyoxî yeno viraştiş. Gulîstan Sonuk derheqê konferansî de zî nê vatê: “Konferans 2 rojî do tena bi beşdarbîyayîşê cinîyan û 2 rojê peyînî zî bi hawayêko pêroyî bêro domnayene ke amanc kêmanî bêrê tespîtkerdene û plansazîya ameyoxî bêro viraştene.”
