Komeleya Heqanê Merdiman (İHD) yê Temsîlkarîya Şaristanê Çewligî, dewa Cafranî û dorûverê aye de vera birnayîşê daran Meydanê Kentî de çalakîya eşkerayîya çapemenî ameya viraştene. Çalakî de endam û temsîlkarê sazgehanê sivîlî, dewijê Cafranî tewrê ci bîbî, Temsîlkarê Şaristanî yê ÎHD’yî Cemallettîn Guzel qiseykerdişê xo de dîyar kerd ke Parlamenterê AK Partî yê Çewligî Zekî Korkutata vatêne kewto mabên û birnayîşê daran ameyo vindarnayene la vejîya meydan ke tena seba “mabênê Roşanî” birnayîş dayo vindarnayene û vat: “Birnayişê daran nêro vindarnayene ma do daristan de dest bi girewtişê nobetê bikerê.”
Merkezê Çewligî Dewa Cafranî û dorûverê aye de no demêko birnayîşê daran dewam keno, vera tahrîbatê ekolojî û talanê xoza pawitoxê heqan û şarê herême vejîyayê meydan.
Pêşengîya Komeleya Heqanê Merdiman (ÎHD) yê Temsîlkarîya Şaristanê Çewligî de temsîlkarê sazgehanê komelî yê sivîlî û xeylê kesî û dewijî Meydanê Kentî yê Çewligî de tewrê protestoyê girseyî û eşkerayîya çapemenî bîyî.
“Mudaxeleyê parlamenterî rast nîyo, mabênê roşanî dayo”
Metno hempar Temsîlkarê Şaristanê Çewligî yê ÎHD’yî Cemallettîn Guzelî wend û vat ke na eşkerayî şertanê normalî de seba 30ê gulane amebî plankerdene la semedê sozê sîyasîyan mecbûr mendê ke taloq bikerê. Derheqê averşîyayîşê prosesî de Cemallettîn Guzelî rayedaran ra nê persî persayê:
“Ma dewijan reyde mîyanê dayîşûgirewtişî de yê, ma ra ame vaten ke Wekilê Çewligî Zekî Korkutata mudaxilê hedîse bîyo, idareyê daristanî reyde pêvînayîş viraşto û seba birnayîşê daran vindero telîmat dayo. Nê malûmatî sero ma eşkerayî betal kerde bî. Qerarê vindarnayîşê birnayene ser ma kêfweş bî. Çi heyf ke rastî de vindarnayîşê birnayene ra zêdeyî rê tehtîlê roşanî ser mabên dayo birnayiş. Badê tehtîlî ca de birnayîşê daran reyna ame dewam kerdene. Sebî ke telîmatê vindarnayîşî daran hewanîya û birnayîşê daran dest pêkerd? Zekî korkutata senî mudaxil bî û çi rê seke ame vatene birnayîş nêame vindarnayîş?”
“Şarê herême do qisey bikero, şarê herême do qerar bido!”
Awbendê ke herême de yenê viraştene, dimayê projeyê HES, GES û RES’î nika zî sînorê Kanîreş û Gimgimî de wazenê JES ( Santralê Enerjî yê Jeotermal) virazê, Cemallettîn Guzelî bale ante serê dorûverê ke xoza sey berê rantî vînenê reaksîyon mojna. Cemalletîn Guzelî vat nê projeyî seba krîzê îklîmî yê globalî û afetê xozayî rê dawetîye vejenê û wina dewam kerd:
“Ma sey esil wayîrê nê erdê qedîmî yê; vera talanê xozaya ma, daristanê ma, awa ma û merga ma reyna ma vengê xo berz kenê. Xoza tu wext xirabîya vera xo bê cewab nêverdena. Felaketê sey Laser, hezaz û depremî ma ra bi mîslî tepîya gêna. Çîyo ke ma aştî ra fehm kenê; kerreyê ma, herra ma awa ma, hewayê ma û darê ma pêrune reyde aştî bena.”
“Waştişê ma bi ca nêro ma do daristan de nobete bigîrê”
Şarê Cafranî û ÎHD’yî reyna waşt ke ca de birnayîşê daristanan bêro vindarnayîşî û ey tepîya game nêerzenê. Cemalletîn Guzelî dîyar kerd ke ey do çalakîyanê xo dewam bikerê û hişyarî da: “Birnayîş dewam bikero hewteyê vernîya ma de dewa cafranî de ma do eşkerayîya çapemenî organîze bikerê. Eke waştişê ma bi ca nêro û birnayîşê daran dewam bikero, ma do warê cayê birnayîşî de dest bi girewtişê nobeta xoza bidê dest pêkerdene.”
