Platformê Sazîyanê Demokratîkan Parka Sumerî ya qezaya Bajarê Neweyî yê Amedî de deklarasyonê “Mîtîngê Azadîye” bi eşkerayîyê da zanayîş. Deklerasyon de Hemsereka DBP’yî Çîgdem Kiliçgun Uçare, Hemserekê DEM Partî Tuncer Bakirhan û Aktîvîsta TJA’yî Çîmen Fîdane qisey kerd.
Bi rayberîya Platformê Sazîyanê Demokratîkan, semedê azadîya fîzîkî ya Rayberê Şarê Kurd Abdullah Ocalanî, 27ê Hezirane de Wan û Mersîn de, 28ê Hezirane de zî Amed û Îstenbol de “Mîtîngê Azadîye” bêrê virastîş. Hemserekê Pêroyî yê DEM Partî Tuncer Bakirhan û Hemserekê Pêroyî yê DBP’yî Çîgdem Kiliçgun Uçar û Keskîn Bayindir zî tede; zaf parlamenterî, hemşaredarî, endam û îdarekarê partîyanê sîyasîyan û sazîyanê sivîlan, endamê platformî û zaf welatijî tewrê nê eşkerakerdîşê deklarasyonî bîyî. Verê maseya ke deklarasyon tede ame eşkerakerdîş, pankarto ke ser de “Bi Rayberîya Azade Ver bi Civaka Demokratîke” nusîyabi, ame daliqnayîş. Peynîya mase de zî resmê Rayberê Şarê Kurd Abdullah Ocalanî ame dardekerdîş û tewrbîyayan posterê Abdullah Ocalanî kerdî berz.
‘Semedê Azadîya Rayber Apoyî ma do pêro qadan pîr bikê’
Aktîvîsta TJA’yî Çîmen Fîdane dîyar kerd ke wexto ke merdim tarîxê merdimayîye analîz keno, vîneno ke Kurdîstan zerrîya Rojhelatê Mîyanênî de cayêko zaf girîng de yo û wina va: “La mixabin Rojhelatê Mîyanênî de her tim şer, kiştiş û qirkerdişî est ê. Bi nê esasî, bi vengdayîşê Rayberê Şarê Kurd Abdullah Ocalanî, prosesê Haştîye û Civaka Demokratîke dest pêkerd û waştiş zî no yo ke nê şer û pêkewtişî bêrê vindarnayîş. Nê 50 serran o ke ziwan, nasname û estbîyayîşê şarê Kurd yeno înkarkerdîş. Cinîyan zî nê semedî ra, nasnameyê xo û şarê xo rê, mîyanê tekoşînî de cayê xo girewt. Felsefeya Rayber Apoyî bi nê esasî raya ma roşn kerde. 27 serrî yo ke serê Rayber Apoyî de tecrîdêko giran est o û ma azadîya rayberê xo wazenî. Rayber Apoyî 27ê Sibate de merheleyêka neweye da destpêkerdîş; cinîyan zî serê nê babetan vaten û paştîdayîşê xo mojna ke na merhele ser bikewê. Ma vanî sey cinîyanê kurdan û şarê kurd sebrê ma nêmend o; muzakerekarê nê prosesî Rayber Apo yo û ganî fîzîkî azad bîyîşê Rayber Apoyî bibo pîl. Vengdayîşê ma seba şarê ma no yo: Semedê demokrasî, teduştî, azadî û aştîye ma do qadanê mîtîngan pîr bikerê û ma sey cinîyanê kurdan do pêşengîya nê çîyî bikerê.”
‘Ganî ma aştîya xo pîya serê zemînêko demokratîk de awan bikê’
Hemserekê DEM Partî Tuncer Bakirhanî va ke ê vînenî ke dewletê cîranî yê ke tede demokrasî kemî yo, mîyanê çireyêk û kaosêko giran de yê û wina vat: “Dewletê ke demokrasî nêgurenenê, heq, huqûq û nasnameya şaran, bawerîyan, cinîyan û ciwananê ke mîyanê sînoranê înan de cuyenî nas nêkenî, qet nêşênî pîya vindê. Ê yan bi şer û alozîyanê zerrî pêro enerjî û ekonomîya xo pûç kenî, yan zî seba operasyonanê hêzanê hegemonîk yê mîyaneteweyî û herêmî zemînî amade kenî. Rastîya xo de, her çi ke nê welatî yan zî welatê ke tede demokrasî kêm o ganî bikê, bi seyrêko eşkera û zelal verê çiman de yo. Modelê aştîye û Civaka Demokratîke yo ke Birêz Ocalanî 27ê Sibate de pêşkêş kerd, hem seba vejîyayîşê krîzê Rojhelatê Mîyanênî, hem zî seba vejîyayîşê şer û krîzanê ke dinya de dewam kenî, bîyo cewabêko zaf hol. Ewro her kes alozîya ke rojhelatê mîyanênî de est a ser vindeno. Eke ma nêwazenîme no kaosê Rojhelatê Mîyanênî bêro mîyanê welatê ma, her çi ke ma nêwazenî; ganî ma aştîya xo pîya serê zemînêko Demokratîk de saz bikê. No semed ra, no vengdayîş wayîrê mihumîyêka tarîxî yo. No seba Tirkîya hem fersendêko pîl o ke persanê xo yê demokratîkan çareser bikero, hem zî seba çareserkerdîşê demokratîk ê persa Kurdî yê 100 serrî, sînor û tewrêko zaf girîng o ke ame akerdîş û hina zî akerde yo.”
‘Mixatabê çareserkerdîşê persa Kurdan Birêz Ocalan o’
Bakirhanî wina dewam kerd: “Yanê 20 aşmîyo ke ma pawenî. Hêvîya çi de yê? Çira pawenî? Bawer bikê ke cewabê nê persî pêro kombîyayîşan de ke ma şînî ci, hetê karker, cinî, şar û bawerîyanê Tirkîya de, her tim ma ra zî yeno perskerdîş. Madem fersendêko wina tarîxî verê ma de esto, nê semedî ra ganî wextêko zaf kilm de seba haştîyêka mayînde û bi rûmet, çi lazimo bêro kerdiş. Ma çira kombîyî? Ma vanî: Muhatabê çareserkerdîşê persê Kurdan Birêz Ocalan o. Nê çîyî tenê ma nêvanî, tayê lîder û aktorê partîyanê îktîdar û muhalefetî zî nê çîyî vanî.”
‘Mesele persê demokrasî yo’
Hemsereka DBP’yî Çîgdem Kiliçgun Uçare destpêk de rojnameger Hafiz Akdemîr o ke 34 serrî verê cî amebî kiştiş, ard vîrî û wina qisey kerd: “Ey seba raya heqîqetî têkoşîyayî. Ma zî bi hurmet û bi heskerdîş Hafiz Akdemîrî anê vîrî. Bêro zanayîş ke bi mîlyonan enbazê ey serê raya heqîqatî de xebitîyenî. Bawerîya ma nîyamê naskerdîş. Ziwanê ma nîyame naskerdîş. Şopa ma nîyamê naskerdîş. La belê ma wazenî ke ameyoxê welatê ma weş bibo. Ameyoxê Rojhelatê Mîyanênî weş bî bibo. Teyna amayoxê ma nê ameyoxê heme şaran û bawerîyan weş bibo. Ma seba nê çîyî xebitîyenî. Bînê felsefeya Rayberîye de ma ver bi verî şonê. Sere de ma vanê wa na dewlete nameyê perse rast bikero. Vanê mesele meseleya terorî ya? Mesele teror nîyo. Mesela persa Kurdan a. Mesela demokrasî ya. Mesela naskerdîşî ya. Mesela awa ke ma dima şerî ra haştîyêka hîna rinde awan bikê. Ma zanê ke hem azadîye hem kî aştîye karê de girana, barê de giran a. Seba her çîyê azadîye, her çîyê aştîye, her çîyê serekê xo ma vanê wa azadî bibo, aştî bibo. Ma seba naye vanê ke, dewlete vînena, aqilê dewletî vîneno, partîyê sîyasî vînenê. No welat de persêka zaf girane est a ke nameyê ci persa Kurdan a. Waştena ma aya ke ma na mesela senî çareser bikê, ganî ma no derheq de zaf gure bikê.”
‘Statuya şarê Kurdî girêdayeyê azadîya Rayber Ocalanî ya’
Çîgdem Kiliçgun Uçare dewamê qiseykerdîşê xo de ard ziwan ke tecrîd nêno wedaritîş û nêverdanê kes şoro Îmrali û bi Rayberê Şarê Kurd re pêvinayîşan bikerê û wina va: “Zindanê Îmralîyî nêverdano vengê Birêz Ocalanî berz bî bibo û vejîyo teber. La ma zanê ke şoreşê Rojavayî de, zereyê şoreşê Rojavayî de paradîgmaya Birêz Ocalanî est a, kedê Birêz Ocalanî est o. Bakur de têkoşînê azadîye de, têkoşînê aştîye de Rayberîya Birêz Ocalanî est a. Başûr de yewbîyayîşê neteweyî de keda Birêz Ocalanî û rayberîya Birêz Ocalanî esta. Rojhelat de verba şerî tîfaqê hêzanê sîyasîyan de kedê paradîgmaya vatişê Birêz Ocalanî est o. Teyna Rojhelatê Mîyanênî de nê her ca de, teyna mîyanê şarê Kurd de, mîyanê pêro şaran de paradîgma cayê xo girew to. Kedê Birêz Ocalanî hînî zelal o ke fikrê Birêz Ocalanî mîyanê pêro şaran de vila bîyo. Statuya şarê Kurdî girêdayeyê azadîya serekatîya xo yo. Ma zî ewro pîya vanî wa serekatî, Birêz Ocalan azad bibo; hem aştî, hem azadî, hem zî ameyoxê ma do bi destê xo û bi keda xo pîya awan bikê.”
Deklarasyon bi dirûşmeya “Bijî Serok Apo” qedîya.
