Hingdar û citkar Murat Ateş dewa Xiver yê Pilemûrîye de weşîya xo rameno. Hardê xo ra dûr nêkeweno. Wayîrvejîyayîşê harde xo ser o vano: “Reçe xo ke kerd vîndî, endî welate xo ra dûr manenîme.”
Hingdar û citkar Murat Ateş, weşîye xo dewa Pilemûrî Xiver de rameno. Welate xo de dûr nêmendo. Mêsan weyî keno, daran nano ro, harde xo keneno, dormeyê xo keno weş. Ameyena wisarî ra tepîya, kare xo beno zêde. Hetera qayte mêsan keno, hetê ke ra bax û bostan ser gûreyeno. Hîre cîrane xo estê, Wisar yeno payîz sono. Murat Ateş, ma rê behsê kare xo û wayîrvejîyayena hardê xo ser qisey kerd.
‘Dewa xo re wayîr vejîyê’
Murat Ateş behsê weşîye xo keno û wîna vano: “Ma Dewa Xiver de nîsenê ro, giredayêya Pilemûrî ya. Seba mêsûn ameyême verê çemî de xo re caye viraşt. Emser vewre zaf vara. Wisar ke ame bostan ramenê, daran nanê ro, şarê ma yeno teber, aye ke yenê xo rê ban virazenê. Tayê ma qaytê mêsûn kenê. Aşme ra tepîya Pertage û Çemîşgezek ra wayîrê mêsan yenê koyê ma û warê ma. Wisarî dewa ma rinda, zimistan ke ame, kes dewe de nêmanenê. Pêro şonê teber, kam ke yeno di hîrê aşmî maneno şino. Jûyê ke welatê xo de weşîya xo nêramit, rêçê xo vîndî beno. Endî no neslo peyên o, tîya ra tepîya kes nîno.”
‘Dewe emser bîya gewe’
Murat Ateş peynî qiseykerdîşê xo de wayîrvejîyayena dewa xo keno û wina vano:”Ma Pilemûrîye de embazen pîya Kooparatîf akerd. Vazenême mêsan weyî bikerê hingemînê xo biroşême. Xozaya ma rindeka, seba mal weyî kerdene, mêsan weyî kerdene rinda. Cîrane ma zimistanî sonê, her vas sere koka xo rewîno, sima ke caye xo vurna, nêameyê welate xo, rind nêbeno. Perûne dewa xo kerd tal şî, çitûr peyser berê, raya dewa çîna, ban çin o. Hardê xo, jîyarê xo, mezelanê xo, welate xo, xo vîr ra mekerê.”
