Qezaya Gimgimî de xoverdayîşê şarê herême yê vera talanê ekolojîk û projeyê Santralê Enerjîya Jeotermalî (JES) roja 36. de dewam keno. Çalakîkeran dîyar kerd ke ê do destûr nêdê destserkerdişê herra pîroz ser û eşkera kerd ke mîrasê baw û kalan tena bi cuyêka komun û bi pawitişê xoza yeno domnayene.
Her cayê Kurdîstanî de, polîtîkayê talakerdişê xoza û warê cuye bi menaya sey ‘enerjî’ û ‘averşîyayîş’ dewam kenê. Kurdîstanî de bitaybetî zî herêmê Dîcle û Firatî, Newalê Zapî û Arasî projeyê Santralê Enerjîya Jeotermalî (JES), Santralê Hîdrolektrîkî (HES) û Santralê Enerjîya Roje (GES) domnênê û xozaya Kurdîstanî bi rîskê çinbîyayîşê rê rî bi rî ya. La vera nê talanî, şarê herême wayîrê herre, awe û ameyoxê xo vejîyenê.
Welatijan ke qezaya Gimgim ya Mûşî vera JES’î xo ver danê, bale ante muhîmîya cuya ekolojîk û mesajê berzkerdişê têkoşîne dayê.
‘Sîstem wazeno herra ma lêşin bikero’
Zeynep Bîngol bale ante pawitişê xozaya Gimgimî û vat ke ê destûr nêdanê talakerdişê herra xo û dîyar kerd ke Gimgim cuya, tarîx û rûmetê înan o û dewam kerd: “Sîstem wazeno xozaya herême biherimno, la ma do destûr nêdê.” Zeynep Bîngol vat ke heta peyîn ê do seba xozaye, cuya komun, kultur û biratîye têkoşîn bikerê.
‘Seba piştîdayîşî Almanya ra ameyo’
Qutbedîn Tekîn, ke seba piştîdayîşî Almanya ra ameyo, îfade kerd ke tîya de seba pawitişê herre û ameyoxî têkoşînêko birûmet yeno rayîr ra berdiş û vat ke qerardarî û hedrekarîya herême xeylî pozîtîf o û veng da şarê Ewropa û dinya ke bêrê piştîdayîşê nê xoverdayîşî bikerê û wina vat: “Ganî herre û welat bêro pawitene ke ameyoxêko pak seba gedeyan bimano.”
‘Ma JES’î nêwazenê’
Suleyman Gunduz diyar kerd ke o bi rojano seba pawitena xozaya Gimgimî xo ver dano. Ey vat ke şîrketê Amerîkayijî wazenê herême de santralê jeotermalî awan bikerê, şar, dewijî û şarê herême nê projeyî qebûl nêkenê, rizaya înan çin a û ê do destûr nêdanê herra înan bêrê talakerdene.
‘Ma destûr nêdanê’
Ezîz Oral bale ante rijnayîşê ekolojî ya hetê şîrketan ra û vat ke ê nêwazenê şîrketê kedwerî herra înan talan bikerê. Ey dîyar kerd ke amancê nê şîrketan talankerdişê maden û cuya herême yo, la ê do destûr nêdê nê talankerdişî. Sewbîna vat ke şar bi serran o zîret û bi heywan wayîrkerdişî debarê xo keno û wazenê bi no şekil dewam bikero.
‘Xoverdayîş cu ya’
Hatîce Şeker diyar kerd ke ganî îqtîdar destê xo herre û welatê înan ra bianco û vat: “Na herre mîrasê baw û kalan, tarîx û cuya ma ya û xoverdayîş zî beşêk nê tarîxî yo. Ma ewro seba pawitişê xozaye, herre, awe, birr û heme erjanê cuye xo ver danê.”
