TJA, DBP û DEM Partî di çarçoveya “Civînên Aştî û Civaka Demokratîk” li gundê Roboskî yê Qilabanê ku 34 welatî lê hatibûn kuştin, civîna gel li dar xistin.
Tevgera Jinên Azad (TJA), Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) li Şirnex, navçe û gundên wê tekildarî banga Aştî û Civaka Demokratîk a Rêberê Gelê Kurd Abdullah Ocalan “Civînên Aştî û Civaka Demokratîk” didomînin. Di çerçoveya civînan de li gundê Roboskî ya navçeya Qileban a Şirnexê ku di 28ê Qanûna 2011an de komkujiyek pêk hatibû û zarok jî di nav de 34 welatî di encama bomberana balafîrên leşkerî ya dewleta Tirk de jiyana xwe ji dest da bû civîna gel hat lidarxistin. Malbatên kesên di komkujiyê de jiyana xwe ji dest dabûn û gelek welatiyên gund tevlî civînê bûn.
Di civînê de nivîsa ku qala nêrînên Rêberê Gelê Kurd Abdullah Ocalan a li ser pêvajoyê û avakirina Civaka Demokratîk dike hat xwendin. Aktivîsta TJAyê Adalet Çîmen Fîdan bal kişand ser banga Abdullah Ocalan û destnîşan kir armanca civînan standina nêrîn û pêşniyarên gel e. Welatiyan jî li ser pêvajoyê pirsên ku meraq dikirin pirsîn û civîn bi nirxandinên li ser pêvajoyê bi dawî bû.
