Bi boneya 26emîn salvegera Komploya Navneteweyî ya li ser Rêberê PKKê Abdullah Ocalan, girtiya siyasî Werîşe Mûradî nameyek şand û got: “Komploya ku armanc dikir bi fîzîkî Rêber Apo tine bike û gelê Kurd temamî qir bike negihişte armancên xwe.”
Girtiya siyasî Werîşe Muradî ya ku li Îranê bi cezayê darvekirinê tê darizandin bi boneya salvegera Komploya 15ê Sibata 1999an a li ser Rêberê PKKê Abdullah Ocalan nameyek şand.
Nameya Werîşe Mûradî wiha ye:
“Ez 26’mîn salvegera komplo û bêbextiya navnetewî ya li dijî Rêber APO şermezar dikim. Bêbextiyek ku bi armanca tunekirina fîzîkî ya Rêber APO û qirkirina hemû gelê Kurd pêk anîn, lê bê encam ma. Rêber Apo ji ber ku azadiya gelan dixwaze li Îmraliyê tê girtin. Rêber Apo bi şoreşa rojane di zindanê de jiyan afirand. Zindana takekesî ya Îmraliyê ku çala mirinê bû kire ode û eywana jiyanê. Lê belê Rêber Apo bû serokê hemû gelên bindest. Rêbertiya me berxwedanek bênavber meşand û dimeşîne. Me di xeta Rêber APO de ji zihniyetên tarî û desthilatdar û dewletdar re got na! Weke ku Zeynep Celaliyan got, ‘Eger em tecrîda li ser Rêber Apo bişkînin wê hemû zindan vala bibin.’
Azadiya Rêber Apo wê bibe sembola jiyaneke nû û azadiyê. Ji bo destpêkirina pêvajoyeke nû û azadiya Rojhilata Navîn em ê têkoşîna xwe bidomînin.”
Hêjayî bibîrxistinê ye cezayê darvekirinê ya Werîş Mûradî ku di rûniştina wê ya di 16ê Hezîran û 4ê Cotmeha 2024an de hate dîtin bi fermî ji parêzerên wê re hatiye ragihandin.
