DEM Partî û AKP’yî 10 serran ra pey roşanê yewbînan pîroz kerd. Parlamenterê AKP’yî yê Semsûrî Resûl Kurt dîyar kerd ke komele wayîrê vengdayîşo tarixî yê Abdullah Ocalanî vejîyaya.
Programê pîrozkerdişê roşanî yê partîyan pêroyê roje de dewam kerd. MHP2yî ra pey heyetê AKP û Gelecek Partî zî Partîya Têduştî û Demokrasîyî ya Şaran (DEM Partî) zîyaret kerd. DEM Partî û AKP serra 2015î ra nat reya ewil bi munasebetê roşanî yewbînan zîyaret kerd.
Heyetê AKP’yî de Parlamenterê Semsûrî Resûl Kurt, endama MKYK’yî Merkezê Pêroyî ya AKP’yî Sanîye Enfîyecî û endamê MKYK’yî Merkezê Pêroyî Abdulkadîr Kadîroglu ca girewt. Heyet hetê Hemverfekê Komîsyonê Hiqûqî yê DEM Partî Ozturk Turkdogan, Cagira Hemsereka Pêroyî ya Berpirsîyara Komîsyonê Şar û Bawerîyan Yuksel Mutlu û Parlamenterê Bêdlîsî Huseyîn Olan ra ame pêşwazîkerdene.
Hêvîya DEM Partî ya roşanî
Yuksel Mutlu ewil qisey kerd û vat: “Nê roşanî de dayîkê ke waştişê aştî û çareserî kenê, goristanan de bîyê û gedeyê înan girewte bîyê. Ma seba çareserîya naye xover danê û ma hêvî kenê ke êdî roşanan de tu dayîk nêbermê. Roşanê şima hemînan pîroz bo.”
‘Şar wayîrê vengdayîşî vejîya’
Parlamenterê AKP’yî Resul Kurt zî vat: “Bi paştîdayîşêko pîl yê birêz Devlet Bahçelî û serekkomarê ma û vengdayîşê Îmraliyî hetê şarî ra bi hewayêko pozîtîf ame erjnayene. Şar wayîrê vengdayîşî vejîya ke Îmrali ra ame kerdene ke bi berpirsîyarîyêka pîle ame kerdene. Ganî nê serdemî de çek nê la aştî, dostanî, aramî bêrê ca. Ez hêvî kena no proses zî demêko tewr nêzdî de bêro ca.”
DEM Partî AKP’yî zîyaret kerd
Eyn saetan de heyetêkê DEM Partî AKP’yî zîyaret kerd.
Heyetê DEM Partî Gelecek Partî zîyaret kerd
Heyetê DEM Partî Gelecek Partî zî zîyaret kerd. Cagira Serekê Pêroyî ya Heqanê Merdiman ra Berpirsîyar Meryem Turktekîn zîyaretî de qisey kerd û vat: “Goreyê ma ma eşkenê ronişê û problemanê xo yê serekeyan bi qiseykerdişî çareser bikerê. Ma hewldayîşanê şima û yê muxalefetî yê bi nê munasebetî pîroz kenê. MA nê prosesî muhîm vînenê.”
‘Têkoşînê ma seba Tirkîyayêka Demokratîk o’
Cagira Hemsereka Pêroyî ya Berpirsîyara Komîsyonê Şar û Bawerîyan Yuksel Mutlu zî vat: “ma hêvî kenê roşan bibo wesîleyê edalet, aştî û demokrasî. Bi hêvîya roşananê ke sîyasetmedar, parlamenterê ma girewte nêyê, ciwanî nêyenê kiştene û girewtene. Ma seba demokrasî, têduştî û azadîye têkoşîn danê.”
Hemverfekê Komîsyonê Hiqûqî yê DEM Partî Ozturk Turkdogan zî wina qisey kerd: “Embazê ma girewte yê. Reyna girewtişê wendekaran ma xemgîn keno. La ma rojanê winasînan de yê ke vengdayîşê aştî û komelo demokratîk ameyo kerdene. Ma hêvî kenê roşan bibo wesîleyê aştî. Ma seba awankerdişê Trikîyaya demokratîke têkoşîn danê. Ez hêvî kena ma do serkewê.”
Dima ra zî zîyaret çapemenî ra girewte dewam kerd.
Pîrozkerdişê roşanî yê Merkezê Pêroyî yê DEM Partî do bi zîyaretanê heyetanê Saadet Partî û DEVA Partî dewam bikerê.
