Hasret Îpek Îlçîn ke atolya mûman akerd, wina vat: “Ez xo bi mûman eşkena bidî nasnayîş. Tîya dinyaya min a. Ez tarîxnas a û eynî wextî de mi verê xo da fîguranê mîtolojîk û cinîyan. Her fîgurêk ez şuxilnena manayêke înan est o.”
Hasret Îpek Îlçîn ke beşê tarîxî ra mezun bîye û lîsansê berzî û doktora kerda, 10 serrî yo mûman reyde eleqeder bena. Wan de atolyeya ‘Mûman’ akerd û pêwa viraştişê mûman, semedê kesê ke wazenê mûman bimusê zî derse dana.
Atoleyeya aye de fîgurê mîtolojîk û cinîyan bale ancenê. Hasret Îpek Îlçîn hîkayeya destpêkerdişê karê xo ser Jinnewsî ra qise kerda.
10 serrî yo mûman viraznena
Hasret Îpek Îlçin dîyar kerd ke rijnayîşê mûman yew rîyê tewr baş yê vengkerdiş û rehetkerdişê hişî yo. Hasret Îpek Îlçin, wina vat: “Wendişê master û doktorayî de mi rojê xeylêk bi stres derbaz kerd. Wexto ke ez înternet de gêraya, mi sîteyêk de destpêkê viraştişê mûme vîna. Nêzdîyê 10 serrî yo ke mûman viraznena û mi sey hobî kerdêne.”
Madeyê viraştişê mûman de yenê şuxilnayîş
Hasret Îpek Îlçîn dîyar kerd ke viraştişê mûman de hîrê madeyî yenê şuxilnayîş û yew parafîn, a bîn zî soya ya û o bîn zî jel o û wina vat: “Soya, fasulya soya ra yena viraştiş. Hetê weşîye de problemê aye çin o. Parafîn petrokîmya yo. Jel zî kîmya yo la petrokîmya nîyo.”
‘Tîya dinyaya min a’
Hasret Îpek Îlçîn bale ant fîgurê ke şuxilnena û wina vat: “Ez esansê ke şuxilnena zî kena ci. Mi verê xo da fîgurê mîtolojîk û tarîxî. Her fîgurêk manaya ci yê cîya est o. No mi keyfweş keno. Ez eşkena xo bi mûme bidî nasnayîş. Ez serê siba dikanê xo akena. Ez kewena dinyaya xo. Ez şuxilêna. Tîya pêro dinyaya min a.”
Hasret Îpek Îlçîn wina vat: “Yê wazenê ez derse dana înan zî. Waştiş zaf zêde yo. Viraştişê mûman, boya aye senî yena weçînayîş. Kam ci boye weş a û senî eşkenê bêrê viraştiş? Ez derheqê nê de her çî dana musnayîş. Atolyeya ma qij a. 3ine zêdeyêr nêeşkena bidî. Ganî berardişê cinîyan komelî rê bêrê qezenckerdiş. Ganî cinî cayêk dest pêbikerê, karêk bikerê. Hewcedarîyê komelî bi nê est o.”
