Kampanya “Ji Abdullah Ocalan re azadî, ji pirsgirêka Kurd re çareseriya siyasî” encamên girîng bi dest xistin. Berdevkên pêngavê diyar kirin ku ew ê ji bo azadiya Rêberê Gelê Kurd Abdullah Ocalan xebatên xwe dewam bikin kampanyaya gerdûnî ya “Ez dixwazim bi Ocalan re hevdîtinê bikim” dest pê bike.
Piştî banga Rêber Gelê Kurd Abdullah Ocalan a 27ê Sibatê ya “Aştî û Civaka Demokratîk” PKKê di navbera 5-7’ê Gulanê de 12emîn Kongreya xwe li dar xist. Nîqaşên ku di Cotmeha 2024an de dest pê kirin, di mijara çareserkiriya siyasî ya pirsgirêka Kurd de rê li ber nêzîkatiyên dewleta Tirk ên xwe dispêrin polîtîkayên ewlehiyê girtin.
Bi taybetî jî Kurdistanî û dostên wan di çarçoveya kampanya “Ji Abdullah Ocalan re azadî ji pirsgirêka Kurd re çareseriya siyasî” ku di 10ê Cotmeha 2023yan de dest pê kiribû, çalakiyên topyekûn dan destpêkirin. Çalakiyên ku di çarçoveya pêngavê de hatin lidarxistin, tevgavbûna dewleta Tirk a di şerî de û konjonktura herêmî bûn sedem ku dewleta Tirk careke din berê xwe bide cem Abdullah Ocalan.
Tevî hemû nîqaşan hê jî şert û mercên Ocalan ên li Îmraliyê nehatine sererastkirin û azadiya fîzîkî ya Ocalan pêk nehatiye. Berdevkên kampanya “Ji Abdullah Ocalan re azadî, ji pirsgirêka Kurd re çareseriya siyasî” Hatîp Dîcle, Zubeyde Zumrut û Sînan Onal têkildarî mijarê ji ANFê re axivîn û diyar kirin ku ew vê carê jî kampanya gerdûnî ya “Ez dixwazim bi Ocalan re hevdîtinê bikim” dê dest pê bike.
‘Em di qonaxa 3yemîn a pêngava gerdûnî de ne’
Zubeyde Zumrut banga Abdullah Ocalan a di 27ê Sibatê de weke qonaxa sêyemîn a pêngava gerdûnî pênase kir û got: “Ev bang bes ne tekstek e, di heman demê de nexşerêya çareseriya demokratîk a pirsgirêka Kurd e û vîzyoneke polîtîk pêşkêş dike. Daxwazên ku li kolanan ji aliyê girseyan ve hatin kirin, zêdebûna baweriya ji aştiyê re nîşan dan.”
‘Xebatên me wê bi xurtî berdewam bikin’
Zubeyde Zumrut di dewama axaftina xwe de bal kişand ser nîqaşên li ser “mafê hêviyê” ya ji bo Abdullah Ocalan û got: “Hiqûqnas di vê çarçoveyê de balê dikşînin ser ‘mafê hêviyê.’ Konseya Ewropayê jî di Cotmeha 2024an de weke şertê mutleq nîşan dabû ku divê Tirkiye heya Cotmeha 2025an reforma têkildarî muebeta girankirî pêk bîne. Ji ber wê yekê divê ev pêngav êdî were avêtin. Her wiha kampanyaya me tehliyekirina hemû girtiyên siyasî jî armanc dike. Xebatên bi vî rengî wê bi xurtî berdewam bikin. Ev kampanyaya ku hem li Tirkiyeyê û hem jî li qada navneteweyî bi hev re tê meşandin, bingeha pêvajoyeke nû ya demokratîk av dike.”
Dê kampanya dest pê bike
Siyasetmedar Hatîp Dîcle jî diyar kir ku Komîteya Pêşîlêgirtina Îşkenceyê (CPT) rapora xwe ya têkildarî serdana ji bo Îmraliyê ya 2 salan beriya niha hê jî neweşandiye û ev yek anîn ziman: “Tevî ku CPT çend rojan beriya niha çûye Tirkiyeyê jî neçûye Îmraliyê û ev yek fikareke cidî ye. Ev mijar di rojeva hiqûqnasên eleqedar û komên mafên mirovan de ne. Saziyên ku berpirsiyariyên xwe yên hiqûqî û wijdanî bi cih naînin, zirarê didin baweriya raya giştî.”
Dîcle diyar kir ku tê payîn bi dirûşma “Ez dixwazim bi Ocalan re hevdîtinê bikim” kampanyayeke nameyan a nû ya gerdûnî bê destpêkirin û destnîşan kir ku ev kampanya wîjdana raya giştî ya navneteweyî ye ku xwedî li îradeya aştî û azadiyê derdikeve. Dîcle anî ziman ku wê têkoşîn û xebatên wan ên bi biryardarî berdewam bikin.
