DEM Partî dîyar kerd ke ey seba heqê cinîyan ê ciwîyayîşêk têduşt, azad û bê şîdet têkoşînê xo bidomnê.
Merkezê Pêroyî yê Partîya Têduştî û Demokrasî ya Şaran (DEM Partî) derheqê 8ê Adare Roja Cinîyan ê Dinya de eşkerayîyêk nuştekî weşana. Eşkerayî de dîyar kerd ke 8ê Adare roja têkoşînê seba heqê cinîyan ê cuye, têduştî û edaletî yo û qetî kerd ke têkoşînê înan seba cuya têduşte, azade û bê şîdetî yo.
Eşkerayî de wina ame vatene: “8ê Adare roja têkoşînê seba heqê cinîyan ê cuye, têduştî, azadî û edaletî yo. 8ê Adare Roja Cinîyan ê Dinya ro heme cinîyê ke bi keda xo dinya weştir kenê, yê ke bi sloganê ‘Cinî, Cuye, Azadî’ vera serdestîya camerdan, şîdet, şer û xizanî xover danê û raya aştî û demokrasî ramenê pîroz bo. Ma do sebo heqê cinîyan ê ciwîyayîşêk têduşt, azad û bê şîdet têkoşînê xo bidomnê.”
