Nêzdîbîyayîşê roşanê Newroze reyde, Amed de dikanê terzîyan de zî seba desîtişê û herînayîşê kincanê neteweyîyan têgêrayîşêko gird est o. Wayîranê dikananê kincanê kurdî ard ziwan ke şarê kurd ganî Newroze de kincanê xo yê neteweyîyan pay bikero û warê Newroze bixemilno.
Roşanê Newroze ke her serre 21ê adare de yeno pîrozkerdene, dikanan de zî seba herînayîş û viraştişê kincanê neteweyîyan têgêrayîşêko gird est o. Kincê sey kiras, fistan, şal û şapik yenê viraştene û dikanî bêvidertiş seba resnayîş sîparîşanê Newroze xebîtîyenê.
Dikandarêk bi nameyê Yemlîxanî ard vîrî ke Roşanê Remezanî û Newroze pîya nêzdî benê û vat: “La na babete sey bazaranê Îran yan Amerîkaye nîyo; şar biney biendîîşe yo û sey verî waştişêko gird çin o. Verê Newroze gelekî weş û geş bîye. La nika şar biney terseno. Hetêk ra zî, şarê ma seba Newroze amadekarî keno. Ma nê karî pîyê xo ra û kalanê xo ra musayî û kenê, ez nifşo dîyin a. Des serrî yo ez tîya de kincanê neteweyîyan roşena. Pancês serrî yo ez nê karî kena. Keyeyê ma pencas serrî yo nê mîyanê nê karî de yo; çi kiras-fistan bo çi şal û şapik bo, ma bi desan serran o nê kincanê neteweyîyan amade kenê. No kar seba ma tena bazirganî nîyo, mîrasêko kulturî yo.”
Ronahî Surme ya ke kincanê neteweyîyan derzena dîyar kerd ke karê xo ra zaf hez kena û vat: “Ez Îzmîr ra ameya tîya. Ma dikanê xo bi nê kincan xemilna çunke Newroze vernîya ma de ya. Ma wazenê waştişanê şarê xo bîyarê ca. Ma hem kincan danê kîra hem roşenê. Nê kincê kurdî yê û seba înan waştişêko weş est o. Heme zehmetîyan reyde, eleqeyê şarê ma yê seba kulturê xo ma gelekî şa keno.”
Dikandare Elanure Baylan vat: “Wexto ke ez bivîna ke ê nê kincan pay kenê, ez zaf şa bena. Wazena ke şarê ma kincanê xo yê herêmî û adetî hertim pay bikero û wayîrê kulturê xo bivejîyo. Ma bi nê kutlurî pîl bîyê û wazenê ke dewam bikero.”
