Endamanê Komîteyê Amadekarî yê Newroza 2026î ya Amedî Ahmet Dogan û Demet Ceylan îfade kerd ke şarê kurdî ganî bi kincanê xo yê herêmkîya sey laserêk biherikîyê warê Newroze û vat: “Gurza ke destê ma de ya, komelo demokratîk o. Eke ma seba nê felsefeyî pîya bibê, ma do bi ser bikewê.”
Komîteyê Amadekarîye yê Newroze deklarasyonê xo yê pîrozkerdişanê 21ê adare yê 2026î vizêrî eşkera kerd. 11ê adare qezayanê Surî, Dep û Bazîd û Kadîfekalaya Îzmîrî de startê Newroze yeno dayene. Amed de Newroze 21ê adare de yena pîrozkerdene û fînalê Newroze Silopyaya Şirnexî de beno.
Hemserekê DBP’yî yê Amedî Ahmet Doganî dîyar kerd ke Newroza 2026î sey Newrozanê bînan nêvîneno û hêvî keno ke seba kurdî û Kurdîstanî bibo cayê destkewtişanê girdan. Doganî mîtolojîya Dehaq û Kawayê Asinkarî ard vîrî û vat: “Ez bawer kena ke Rojhelatê Kurdîstanî na roja 21ê adare do adirê Newroze û azadîye biveşno.”
Doganî vat ke emser bîyo felsefe û paradîgmaya Rayber Abdullah Ocalanî û vat: “Gurza ke destê ma de ya, komelo demokratîk û sîstemê ci yo. Eke ma seba nê felsefeyî pîya bibê, ma do bi ser bikewê. Çareserîya ke vera sîstemî yenê zordayene, cinîyî, ciwanî û bawerîyê bînî mîyanê yewîya kurdan û paradîgmaya komelê demokratîkî de yê.”
Doganî venga şarî da ke bi kincanê xo yê komelkîyan beşdar bibê û vat: “Tu wext îmkanêko winayên nêkewto destê şaranê bindestan. Ma wazenê heme şarê kurd û dostê înan sey laserêk biherikê warê Newroze. Eke her kes bi kincanê neteweyîyan bêro, sîstem nêeşkeno vernî de vindero.”
Endama Komîteyê Amadekarî Demet Ceylan dîyar kerd ke deklarasyonê xo bi şîarê awankerdişê komelêko yewbîyaye û demokratîkî amade kerdo û vat: “Ma wazenê Newroza 2026î de qij, cinîyî û ciwanî heme bi kincanê kurdî beşdar bibê. Waştişanê xo bi ziwanê kurdî bîyarê ziwan; kuçeyan û bazaran ra bi nasname û kincanê xo pîya Newroze pîroz bikerê. Vengê haştîye û wayûbiratîye waranê Newroze ra hîna berzêr biqîrê.”
