Odaya Doktoran a Êlihî derheqê rayîrşîyayîşê xo yê ver bi Anqara eşkerayî daye û dîyar kerd ê seba pawitişê qadê weşîye û heqanê xebatkaranê weşîye roja 14ê adare Anqara de yenê têhet.
Odaya Doktoran a Êlihî derheqê Hewteyê 14ê adare û rayîrşîyayîşê înan ê ver bi Anqara bi sloganê, “Ma seba aştî û demokrasî û weşîya komelî, vatişê xo vanê” vernîya Nêweşxaneyê Perwerde û Cigêrayîşî yê Êlihî de eşkerayî daye çapemenî. Eşkerayî de xeylê endam û rayberê TTB’yê Êlihî, endam û rayberê sazgehanê sîvîl û xeylê kesî beşdarê çalakî bîyê. Metna eşkerayî hetê Serekê Odaya Doktoran a Êlihî Alî Îhsan Gundogduyî ra ame wendene.
Gundogduyî vat ke ê emser zî bi qarardarîye qadan de yê û têkoşînê xo domnenê û vat: “Seba ke piştî bidê xebatkaranê weşîye û seba vurîyayîşêko demokratîk qadê weşîye de bîyarê ca, bi Meşa Spî ver bi Anqara ma rayra şonê. Qadê weşîye û nêweşan ra bi çimê sermaye û bazirganîye ewnîyenê û ma bi her hewayî vera ney ê. Rayîrşîyayîşê ma Amed de dest pêkeno, Riha, Dîlok, Osmanîye û Edene ra vîyareno û 14ê adare Anqara de qedîyena. Ma venga hemwelatîyanê xo danê ke beşdar rayîrşîyayîşê ma bibê.”
Eşkerayî bi çepikan qedîyaye.
