Badê xebera şahadetê Salih Muslimî hetê partî, dezgeh û rayberanê sîyasîyan ê kurdan ra têdima mesajê serweşîye ameyî weşanayene. Mesajan de ame vatene ke Salih Muslim do tim vîran de bimano û têkoşînê ey bêro domnayene.
PYD: PYD’yî eşkerayîya xo de vat Salih Muslimî xebatanê sîyasîyî û rêxistinî yê bi serran de paşta xurte dayê têkoşînê azadîye û têgêrayîşê neteweyî yê kurdan de rêça muhîme verdaye.
Mazlûm Ebdî: Fermandarê Pêroyî yê Hêzanê Sûrîyeya Demokratîke Mazlûm Ebdîyî vat Salih Muslimî têkoşînê şarê kurdî yê 40 serranê peyênan de rolo muhîm kay kerd û bi serkêşanê şorişê Rojawanî ra yew.
KNK: Kongreya Neteweyî ya Kurdîstanî (KNK ) ard ziwan ke Salîh Muslim dîplomatêko serkewte û serkêşanê şorişê Rojawanî ra yew bi û vat vefatê ci semedê sîyasetê kurdan vînkerdişo pîl o.
Aldar Xelîl: Endamê Konseya Hemserekîye ya PYD’yî Aldar Xelîlî vat Salîh Muslim do bi vindertişê xo biprensîbî û têkoşînê xo yê qerardarî, sey hemrayê raştî û xoverdayoxê neteweyî vîran de bimano.
Kongra Star: Koordînasyonê Kongra Starî vat Salîh Muslim sîyasetmedar û dîplomat bi ke 1980yan ra nata semedê azadîya şarê kurdî bêmabên têkoşîn kerd.
DEM Partî: Hemserakanê Pêroyî yê DEM Partî Tulay Hatimogullari û Tuncer Bakirhani vat Salîh Muslimî emrê xo da têkoşînê azadîye yê kurdan û Rojawan de bi kedkarê têkoşînêkê girdî.
Neçîrvan Barzanî: Serekê Herêma Kurdîstanî Neçîrvan Barzanîyî ard ziwan ke Salih Muslimî emrê xo semedê têkoşînê sîyasîyî yê seba heqanê meîrûyan ê kurdan feda kerd û keye û merdimanê ci rê serweşîye waşte.
Bafil Talabani: Serekê YNKyî Bafil Talabanî îfade kerd ke Salih Muslim serkêşanê namdaran ê Rojawanî ra yew bi û vat seba pawitişê heqanê şarê kurdî û yewîya neteweyî rol kay kerd û keye û PYDyijan ra serweşîye waşte.
Têgêrayîşê Gorranî: Têgêrayîşê Goranî ard ziwan ke Salih Muslim têna rayberêko sîyasî nêbi, eynî wextî de sembolê xoverdayîş û fedakarîye bi û vat vefatê ci seba têgêrayîşê kurdan û bitaybetî seba Rojawanî vînkerdişo gird o.
Akademîya Sîyasîye ya YNKyî: Akademîya Sîyasîye ya YNK’yî vat Salih Muslimî destpêkê şorişê Rojawanî ra seba têkoşînê şarê kurdî û înşayê tecrubeyê îdareyê xoserî rolo muhîm kay kerd û merdimanê ey rê serweşîye waşte.
KON-MED: Konfederasyonê Komeleyanê Kurdîstanijan ê Almanya (KON-MED) vat Salih Muslim sey sîyasetmedarêkê seba ameyoxê azad û birumetî yê şaran têkoşîn kerd, do vîran de bimano.
KOMAW: Komeleya Keyeyanê Şehîdan (KOMAW) ard ziwan ke Salih Muslimî wextê prosesê şorişê Rojawanî de seba azadîya şaran têkoşîno muhîm kerd û vat o do sey babîyê şehîdêkî vîrê şarî de bihurmetî bêro vîrardene.
