Komîteya Rayraberdişî ya Merkezê PENa Kurdî seba Endamê Konseya Hemserekîye ya PYD’yî Salih Muslimî mesajê serweşîye weşana.
Cenazaya Salih Muslimî Başûrê Kurdîstanî ver bi Rojavayê Kurdîstanî ameye oxirkerdene. Cenazaya ci Awbendê Qamişlo de bêra pêşwazîkerdene û Kobanî de bi merasimêko pêroyî bêro oxirkerdene.
PENa Kurdî mesajê xo de bale ante têkoşîn û cujya Salih Muslimî ser o û vat: “Bi zerrîyêka xemgîne xebera koçê peyên ê sîyasetmedarê gird, hemray û kedkarê rayîrê azadîye Salîh Muslumî pêhesîyayî. O qehremano ke 3ê adare 1951î de şaristanê xoverdayîşî Kobanî de çimê xo akerdbî, çi heyf ke 11ê adare 2026î Hewlêr de rîyê nêweşîya gurçikan ra xatirê xo şarê xo ra waşt û şi heqîya xo.”
PENa Kurdî vat: “Salih Muslum tena sîyasetmedarêk nêbî; mîmarê yewîya neteweyî û vengê raştikên ê şorişê Rojavayê Kurdîstanî bi. Rojanê tewr çetin û tarî yê xoverdayîşî de bi felsefe û sebrê xo eşkayêne ke biafirno. Bi xebat û zanayîya ci reyde kurdî bîyî yew zerrî, yew armanc û yew hişmendî. Nîşanê dinya da ke hêzê şarêko azadîwaz her hêzî ra xurtêr o.”
PENa Kurdî peynî de serweşîye waşt û vat: “Koçê peyên ê nê serkêşî girdî û Pîyê Şehîdî seba warê sîyasî û neteweyî ya Kurdîstanî vîndîkerdişêko zaf giran û bidej o. Rayîrê ci roşn û vîrameyîşê ci hertim gandar bibê.”
