Sebelan Kiliç derheqê birayê xo rojnameger Osman Kiliçî (Gundî) de qisey kerd û dîyar kerd ke ey rojnamegerîye ra zaf hes kerdêne.
Rojnameger û dîrektorê Ajansa Xeberan a Firatî (ANF) Osman Kiliç (Gundî) ke demêko derg nêweş bî, 12ê adare de Hollanda de cuya xo ra bî. Osman Kiliç serranê 90yan ra karê Çapemenîya Azade de ca girewtêne. Cenazeya ci bajarokê Zoqeydê yê taxa Misircê ya Sêrtî de ameye definkerdene
Waya ci Sebelan Kiliç derheqê birayê xo de qisey kerd û vat: “Ma sey keyeyî serra 1984î de Kurdîstanî ra şîyê Ewropa. Serra 91î ra dima waya ma ya girde beşdarê refanê gerîlayan bîye û seba naye ma mecbûr mendê ke sey heme keyeyî şêrê Ewropa. Badê ke waya ma beşdarê gerîlayan bîye, Gundîyî zî uca qerar da û beşdarê xebatanê Têgêrayîşê Azadîye bî.”
Sebelan Kiliç vat: “Gundî zaf xebatanê rojnamegerîye ra hes kerdêne. Henî ke girêdayeyê karê xo bî ke nêeşkayêne fek ci ra verado û agêro welatî. Taybetîya ci o bî ke nêwaştêne xebatê çapemenîye apey nêkewê. Bi ma sereberzîye bîye la hetê ma de nêardêne ziwan.”
Sebelan Kiliç vat: “Heta gamê peyênî bi serekîya xo û bi felsefe û paradîgmaya ci ya newîye girêdaye bî. Gundî sey şorişgerêk bî ke destpêkî ra ameyo. Goreyê mi sey şorişgerê dewranê destpêkî, Mezlum, Heqî, Egîd, Erdal, Fûat, Elî Riza. Heta gamê peyênî tepşê xo pawit. Heta deqaya peyêne zî zerrîya ci seba rêxistina ci û welatê ci dayêne piro. Vatêne ‘ma do emser Newroze pîya nêvînê.'”
