Başûrê Kurdîstanî de Newroze serranê 90î ra hetê sîyasî ra zêdeyêr hetê kulturî, dîplomatîkî û turîzmî ra aver şîye. La nê vurîyayîşî reyde zî Newroze komelê Başûrî de sey nîşanê serewedartiş, xoverdayîş û têkoşînî cayê xo pawena.
Başûrê Kurdîstanî de Newroze serranê 90î ra qonaxêka neweye de ya. Komelî de hetê turîzmî û bîrokratîye de hetê dîplomatîkî ra aver şîye. Adirê Newroze êdî tena sembolê ameyîşê wisarî nîyo, eynî wext de ekonomî, moda û dîplomasîya herême zî gêno binê sîwana xo.
Başûrê Kurdîstanî de Newroze tena roşanê wisarî nîyo, eynî wext de serrgêra Serewedartiş û Xoserî ya 1991î ya. Xelisîyayîş û îşxalkerdiş û şerê Kerkûkî ke roja Newroze de bîyê, komelî de sey “Adirê Serkewtişî” ca girewto û ruhê xoverdayîşî hîna gandar keno.
Pîrozkerdişanê Newrozanê Başûrî de vurîyayîşo tewr gird statuyê herême ra girêdayî yo. Serranê 90î de Newroze zêdeyêr sey serkewtişê vera rejîmê Baasî û sembolê azadîye dîyêne. Serra 2003î ra dima Newroze hetê sîyasîye ra prosedurêkê fermî û dîplomatîkî bî; sazgehê hukmatî pîrozkerdişan organize kenê, mêmanê teberî û dîplomatî beşdar benê.
Başûrî de pîrozkerdişanê Newroze hetê hunerî û muzîkî ra zî temamî aktuel bîyî. Verê Newroez bi kilaman û govendan dormeyê adirêko sade pîroz bîyêne, nika Hewlêr û Silêmanî de konserê girdî bi teknolojîya berze ameye kerdene. Adirê Akrê bîyo “Festîvala Meşalayan” û sey marqeyêka Kurdîstanî ya mîyanneteweyî nas beno. Cil û bergê kurdî zî vurîyayî, meslekê modaya kurdî vejîya meydan.
