Girewteya sîyasî Şerîfe Mihemedî ya ke Hepisxaneyê Lakan ê şaristanê Reşt ê Îranî de ameyêne girewtene, bi destûrê boyedayîşî bi demkî ameye veradayene.
Rêxistina Heqanê Merdiman a HRANA’yî eşkera kerd ke girewteya sîyasî ya kurd Şerîfe Mihemedî ya ke Hepisxaneyê Lakan ê şaristanê Reşt ê Îranî de ameyêne girewtebe, destûro demkî girewt û bi hewayêko demkî ameye veradayene.
Ameyo dîyarkerdene ke berpirsîyaranê hepisxaneyî Şerîfe Mihemedî bi kefaletê hefteyêkî veradaya.
Derheqê Şerîfe Mihemedî de
Şerîfe Mihemedî 5ê kanûna 2023î de keyeyê xo yê şaristanê Reşt ê Îranî de hetê hêzanê girêdayeyê Wezaretê Îtlaetî (îstîxbarat) ra bêyê fermana dadwerî ameye destbendkerdene. Şerîfe Mihemedî dimayê girewtişî erşawite hepisxaneyê şaristanî Sine yê Rojhelatê Kurdîstanî. Uca de seba hucreya yewkesî ame erşawitene û demê cipersayîşî de îşkenceya fîzîkî û psîkolojî aye rê ame kerdene. Rayîr nêame dayene ke keye û avûkatanê xo reyde pêvînayîş bikera, dima ra zî hepisxaneyê Lakan ê şaristanê Reşte rê ameyê transferkerdene.
Dewaya Şerîfe Mihemedî hetê şûbeya yewin a Mehkemaya Şorişî ya Reşte ra bi serekîya Dadwer Mihemed Elî Derwêş Goftar ra ameye rayraberdene. 4ê temmuza 2024î de bi sucdarîyya “vera îqtîdarî wirzîyayîş” cezaya dardekerdişî aye rê ameye dayene. 26ê tebaxa 2025î de zî na ceza hetê şubeya 39. a Mehkemaya Berze ya Îranî ra bi temamî ameye qebulkerdene. Dima na ceza bi saya tedayanê raya pêroyî û dinya kerde cezaya 30 serrî ya hepisxaneyî.
