Welatijanê Wanî derheqê Newroze de qisey kerd û vat: “Heta Newroze ameya na aste xeylê bedelî ameyê dayene. Naye ra ganî ma wayîrê ruhê Newroze yê xoverdayox vejîyê.”
Adirê Newroze yê Kawayê Asinkarî vera zulmê Dehaqan, koyanê Zagrosî de wekerdbî, tarîxî têkoşînê kurdan de cayêko bêemsal girewto. Roja ke adir ameyo wekerdene heta ewro Newroze çar hetanê Kurdîstanî de bi ruhêko xoverdayox û kurdewar yenê pîrozkerdene. Vakurê kurdîstanî de Newroza emserî bi sloganê “Newroza Azadî û Yewîya Demokratîk”yena pîrozkerdene. Welatijanê Wanî derheqê manedayene û hêvîyanê xo yê Newroza emserî de hîsê xo ardî ziwan.
Newroze azadî, aştî, xoverdayîş û wisar o
Welatijanê Wanî vîr vist ke Kawayo Asinkarî adirê Newroze wekerdo , kurdî musnayê xoverdayîşêko bêmabên kerdê û ne çîyî îfade kerdî: “Heta ke Roşanê Newroze ameya na aste xeylê bedêlî ameyê dayene. Coka ganî ma ro ruhê Newroze yê xoverdayox û têkoşer wayîr vejîyê. Roşanê şarê kurdî yê otantîk roşanê Newroze yo. Newroze azadîya, aştîya, xoverdayîş û wisar o. Ma hêvî kenê ke Newroza emserî serê de Rayberê Şarê Kurdî Abdullah Ocalan û seba girewteyanê sîyasî seba şarê kurdî û heme şaranê bindestan rê aştî, azadî û têduştî bîyaro. Sewbîna zî Newroza emserî wa seba şarê kurdî serkewtenê bîyaro.”
