Artêşa Îsraîlî eşkera kerd ke înan sey cewabê hêrişanê serê Durzîyan, hêrişê binawanîya Hukmatê Demkî yê Sûrîya kerdo.
Vizêrî Artêşa Siwêyda eşkera kerd ke hêzanê Hukmatê Demkî yê Sûrîya hêrişê Durzîyan kerdo û da zanayene ke netîceyê hêrişan de kişte û birîndarî estê. Sewbîna zî hûmarêka zêde Durzî zî remnayê. Artêşa Îsraîlî zî eşkera kerd ke înan seba ke cewab bidê hêrişanê binawanîya Hukmatê Demkî yê Sûrîya bombabaran kerda.
Eşkerayîya Arteşa Îsraîlî de wina ame vatene: “Hêzanê ma yê hewayî hêriş berdo serê çek û merkezê fermandarîya kompleksanê leşkerî yê başûrê Sûrîya.” Artêşe dîyar kerd ke ey do tu hêrişanê ke vera Durzîyan yenê kerdene tolere nêkerê û dewam kerd: “Seba pawitena înan û şopnayîşê rewşa herême do operasyonê ma dewam bikerê.”
Fermandarîya Hêzanê Pawitena Neteweyî yê Siwêda vizêrî bi eşkerayîyêk dîyar kerd ke netîceyê hêrişanê herêma Siwêda de 7 kesan cuya xo vîndî kerda, 4 kesî birîndar bîyê û 19 kesî zî ameyê remnayene.
