Serekê YNK’î seba yewîye û piştîyayewbînangirewtişî partîyanê sîyasîyan rê vengdayîşêk kerd û vat: “Hewceyo ke ma pêro pîya yewbinî de xewat bikime ke şarê xo xetereyanê herême ra bipawim.”
Serekê Yewîya Niştimanî ya Kurdîstanî (YNK) Bafil Talabanî seba Roşanê Newroze mesajê pîrozkerdene weşana. Bafil Talabanî mesajê xo de wina vat: No Roşan serrgêra serhildana ‘Kerkûka Qudsa Kurdîstanî’ ra hemdem o û ayera seba şarê Kurd meseleyêka neteweyî ya muhîma. Roşanê Newroze seba Kurdan teyna Roşan nîyo eynî wextî de sembolê aştî, biratî û yewîya şarî ma yo. Na Newroze ma teşwîqê pîya bîyayene, pîya xebatkerdene, pîya pawitene û xizmetkerdena şarê ma yê delalî kena.
‘Ganî vengê partîyanê Kurdan yew bo’
Serekê Yewîya Niştimanî ya Kurdîstanî Bafil Talabanî mesajê xo de vengda partîyanê kurdan û wina qedêna: “Hewceyo ke ma pêro pîya yewbinî de xewat bikime ke şarê xo xetereyanê herême ra bipawim. Ma ganî yewveng bime.”
