12 baroyê Vakurê Kurdistanî verba hêrişanê Dewleta tirke ke Awbendê Tişrînî ser o benê reaksîyon nîşan da û va: “Ganî şarê sîvîl her şert û mercan de bêro pawitene.”
Baroyê Amed û Wanî zî tede 12 baroyê bajaranê Vakurê Kurdistanî derheqê hêrişanê ke sîvîlan ke Awbendê Tişrînî yê Rojawanê Kurdistanî de nobet gênê ser o beyanat da. Beyanat de ameyo vîrardene ke hêrişo peyên de Kaykerdoxê Şanoyî yê Kurd Bavê Teyar (Cuma Xelîl Îbrahîm) zî tede 6 kesê sîvîlî ameyê kiştene. Beyanatê ke bi sernameyê “Ganî şarê sîvîl her şert û mercan de bêro pawitene” de ameyo dîyarkerdene ke hêrişo ke vera sîvîlan bîyo, eşkera binpêkerdişê huqûqê mîyanneteweyî yo.
Beyanat de wina dewam bîyo: “Cayanê bînan ê Surîye de êdî cuye normal bîya la Vakur û Rojhelatê Surîye de hema zî şer dewam keno. Hêrişo tewr peyên de ke vera Awbendê Tişrînî de bîyo, hunermendê Kurd Cuma Xelîl Îbrahîm (Bavê Teyar) zî tede 6 kesê sîvîlî cuya xo vîndî kerd û 15 kesê sîvîlî zî birîndar bîyî. Heq rehma xo kaykerdoxê şanoyî Bavê Teyarî ke komelê Kurdî zaf ey ra hes kenê û sîvîlê bînî ke cuya xo vîndî kerda ser de bikero û ma seba birîndaran şîfaya xeyrine wazenê.” Baroyê ke beyanat îmze kerdî nê yê: Semsûr, Agrî, Êlih, Amed, Îdir, Colemêrg, Mardîn, Mûş, Sêrt, Riha, Şirnex û Wan.
