Hemwelatîyê ke beşdarê Newroza Amedî bîyî, waşt ke azadîya Rayberê Şarê Kurdî Abdullah Ocalanî bêra temînkerdene û îfade kerd ke ê seba aştî û seypêyî ê waran ra yê.
Se hezaran kesî bi şîaranê “Newroza Azadî û Demokrasîye” û “Newroza Azadî û Yewîya Demokratîke” beşdarê Newroze bîyî ke Parka Newroze ya taxa Rezana Amedî de pîroz bîye. Hemwelatîyê ke saetanê serê sibayî ra war pirr kerdbî, bi slogan û posteran coşê Newroze eşkera kerd û bi taybetî waştişê azadîya Rayber Apoyî îfade kerd.
Îreme Naz Çelîk ke Ankara ra ameybî, vat: “Newroze seba mi manaya haştî, azadî û demokrasîye ya. Ma bi sloganê ‘Jin, Jiyan, Azadî’ bawer kenê ke do sibayanê azad û bihaştîye biciwîyê.”
Hetîce Guneş vat: “Newroze seba ma xoverdayîş o. Serewedartişê Kawayê Asinkarî yê vera zilmî û adirê xoverdayîşî ke Mazlum Doganî hepisxaneyê Amedî de bi hîrê çopanê kibrîtî pana, sembolîze keno.”
Henîfe Kaya waştişê haştî û azadîye ard ziwan û vat: “Ma piştîya Rayberîya xo de yê, haştî û azadîye wazenê. Ma wazenê ke Rayberîya ma û heme tepîşteyî azad bibê.”
Mecît Urgayî vat: “Newroze seba ma destpêkê azadîye û azadbîyayîşê Birêz Ocalanî yo. Seke Yilmaz Guneyî vatbî, ‘Rojêk, tîje do seba ma zî akewa, a roje gama ke Birêz Ocalan azad bibo do seba şarê Kurdîstanî zî tîje akewa.”
Heqî Aslanî vat: “Ma bi waştişê haştî û seypêyîye ameyê warê Newroze. Ma wazenê ke mîyanê kurdan û tirkan de haştî bibo. Ma hetê gonî de nîyê, hetê haştîye de yê.”
Salîh Kalir û Îsmaîl Akbabayî zî dîyar kerd ke Newroze roşanê heme bindestan o û sembolê pîyaciwîyayîşî yo.
