Serekwezîrê Lubnanî Nevaf Selamî îdia kerd ke çalakîyê Hîzbullahî yê Lubnanî rasterast hetê Pasdaranê Şorişê Rejîmê Îranî ra yenê kontrolkerdene.
Televîzyonê Al Arabîya ewro Serekwezîrê Lubnanî Nevaf Selam reyde roportaj kerd. Neval Selman roportaj de vat ke efserê Pasdaranê Şorişê Rejîmê Îranî operasyonanê Hîzbullah ê Lubnanî vera Îsraîlî rayra bênê û wazenê hukmatê Lubnanî vera Îsraîlî biancê mîyanê şerî.
Selam: Heyfgirewtişê Hamaneyî karê Lubnanî nîyo
Selam, semedê eştişê roketan û hêrişê serê Îsraîlî ke wazenê bi nê hewayî Lubnanî biancê mîyanê pêkewtişî, Hîzbullah rexne kerd û vat: “Ameyo eşkerakerdene ke no şer seba heyfgirewtişê kiştişê Hamaneyî yo. No yeno na mana ke no şer serê ma de ameyo ferzkerdene û girewtişê heyfê Hamaneyî karê Lubnanî nîyo.”
Pasdaranê Rejîmê Îranî bi dronanê çedaran da Qibrisî ro
Serekwezîrê Lubnanî Nevaf Selamî dîyar kerd ke 20 rojî ra ver vera kampê Brîtanya yê başûrê Qibrîsî bi dronanê çekdaran hêriş ame kerdene. Nevaf Selamî dîyar kerd ke no hêriş hetê Pasdaranê Rejîmê Îranî yê Lubnanî ra virazîyayo.
Selam: Nê kesî bi pasaportanê sexte û bêqanûnî Lubnan de yê
Selamî dîyar kerd ke Pasdaranê Şorişê yê Rejîmê Îranî, Lubnan de amade yê û operasyonanê leşkerî rayra benê. Goreyê roportajê Selamî nê kesî bi pasaportanê sexte û bi hewayêko neqanûnî kewtê mîyanê Lubnanî. Nevaf Selamî îlanê Pasdaranê şorişê ke vatbî “Ê vera Îsraîlî, Hîzbullah reyde operasyonanê hempar rayra benê” sey delîlê rolê înan ê rayraberdişê pêkewtişê Lubnanî vera Îsraîlî bi name kerd.
Serekwezîrê Lubnanî roportaj de vîr vist ke hukmatê Lubnanî na aşme qerar dabi ke heme çalakîyê Pasdaranê Şorişê yê Lubnanî qedexe kerdê û Hîzbullahî ra waştbi ke çekanê xo teslîmê dewlete bikerê.
