Serekê MHP’yî yo Pêroyî Devlet Bahçelî kombîyayîşê grûba partîya xo ya meclîsî de qisey kerd û vat ke çarçeweya hedefê prosesî de rastkerdişê demokratîk û huqûqî do game bi game bêrê caardene.
Bahçelîyî bal ante raporî ser o ke komîsyonê meclîsî amade kerdo û vat ke na çarçewa de gamê hewceyî do bi plansazîye bêrê eştene.
Bahçelî vat: “Çarçeweya hedefê ma yê ‘Tirkîyêka bêterore’ de goreyê raporî ke komîsyonî amade kerdo rastkerdişê demokratîk û huqûqî do game bi game bêrê caardene. Nê prosesî de ganî eşkerayîyê dejinî ke bibê sebebê fehmê xeletî, wehîman teşwîq bikerê û şikîyayîşan zêde bikerê bi dîqet tira bêro dûrîkewtene.”
Bahçelîyî îfade kerd ke ganî proses nêro lezkerdene û vat: “Ez bawer kena ke roşanî ra dima reformê heme hetan do game bi game bêrê caardene. Bê ke hesabê erzanan bikerê, bê ke feyde bido pênêameyîşanê hurdîyan, bê ke bikewo hukmanê basîtan dima, gamê qanûnî û demokratîkî ke nêzdîyê waştişê wîjdanê pêroyî yê, do bi rêze bêrê eştene.”
Bahçelîyî derheqê rastkerdişan de ke yenê waştene, tu teqwîmêk nêda û vat: “Ma do teqez şahîdîye bikerê ke îdîa beno ke mabênê ma û serekîya afirnayoxe ya PKKyî de xetêka sure est a, miletê tirkan o gird do bi qalema sure nameyê înan xêz bikero. Wext, dermano tewr gird o. Sebir çeko tewr xurt o.”
Bahçelî qiseyê xo de qewmîyayîşanê herêmkîyan ser o zî qisey kerd û vat: “Şerê ke ê hetê bînî yê sînoranê ma de dewam kenê, nîşan da ke şarêk, miletêk heta zereyî ra nêro parçekerdene şansê tu hêzêko dişmenî yê serkewtişî çin o.”
