Silopîya de pîrozkerdişê Newroze bi tewrbîyayîşê des hezaran kesî ame kerdene. Hemsereka Pêroyî ya DBP’yî Çîgdem Kiliçgun Uçar bale ant prosesê Aştî û Komelo Demokratîk ser o û waşt ke qanûnê ke azadîya Rayberê Şarê Kurdî Abdullah Ocalanî garantî kenê, ê zî mîyan de gamê entegrasyonê demokratîk û demokratîkbîyayîşî yê muhîmî bilez bêrê eştene.
Newroza Silopîya bi tewrbîyayîşê des hezaran bi çoşe ameye pîrozkerdene. Girseyî saetanê serê sibayî de meydan de kesk, sûr û zerd xemelnabi verê def û zirna de bi govende dest bi şayîya Newroze kerd. Welatijan kincê neteweyî xoradayê, slogane ke sozdarîya înan bi Rayberî Şarê Kurdî Abdullah Ocalan, cangorîyê têkoşînê azadîye û yewîya şarê kurdî îfade kerdêne, vatî. Girse hetêk ra bi çoş Newroze pîroz kerd û heto bin ra zî bi pankart û sloganan mesajê sîyasî dayê.
Mesajê Abdullah Ocalan ame wendene
Meydan o ke hetê welatijan ra amebî pirrkerdene, badê rêzgirewtişê seba cangorîyanê têkoşînê azadî û demokrasî, adirê Newroze hetê dayîk û sîyasetmedaran ra ame wekerdene. Dima ra mesajê Rayberê Şarê Kurdî Abdullah Ocalanî ke seba Newroza Amedî erşawitbi, tîya de zî ame wendene.
‘Yewîya neteweyî zerrîya şarî de ameya caardene’
Parlamenterê Şirnexî yê DEM Partî Zekî Îrmez pîrozkerdişî de qisey kerd û wina vat: “Her çar hetanê Kurdîstanî de seba azadîye, yewîye ferz a. Zerrî û mezgê şarê kurdî de êdî yewîye ameya caardene.”
‘Şarî deyîranê hunermendan reyde govende girewte’
Hunermend Ata Silopî sehne girewt û deyîrî xo pêşkeş kerdî. Dima ra Azad Ergîn sehne girewt deyîrê xo vatî, badê ra Îsmaîl Silopî vejîya û deyîrê xo pêşkêş kerdî. Girseyî demêko derg deyîranê hunermendan redye govende girewte.
Cangoriyê azadî ameyê vîrardene
Hemsereka Pêroyî ya DBP’yî Çîgdem Kiliçgun Uçar pîrozkerdişî de bi kirmanckî û kurmancî Newroza şarî pîroz kerd. Çîgdem Kiliçgun Uçar wina qisey kerd: “No şaristan bi xoverdayîşê xo bîyo meşaleyê Kurdîstanî. Wextanê tewr çetinan de pêşêngîya serewedaritişan kerd. Her bijî Silopî, Şirnex û Botan. Şarê ma yo erjîyaye Silopî de xeylê embazê ma yê ke ma bîyarê vîrê xo est ê. Ma vanê heval Sevê, Fatma û Pakîze şima nêameyê xo vîrrakerdene. Şarê Silopî tîya de yo. Birêz Ebûbekir Denîz û Serdar Taniş embazê şima, dayîka Taybet gedeyê to meydanê Newroze pirr kerdo.”
