Endama Komîteya Amadekar a Merkezî ya Newroze Sema Koç tesîr û netîceyê Newroza emserî yê şarê kurdî ser o erjnayê û dîyar kerd ke na Newroze heme serranê vîyarteyan ra cîya bîye û tewrbîyayîşê se hezaran kesî mesajê azadî û yewîye da û vat: “Reyna ame dîyarkerdene ke şar wazeno Rayber Apo Newroza serra vernîya ma de mîyanê ma de bo.”
Newroza emserî bi sloganê “Newroza Azadî û Yewîya Demokratîke” bi desan merkezan de ameye pîrozkerdene. Bi mîlyonan kesî tewrê pîrozkerdişê Newroze bîyê, mesajê xurtî dayê. Bi mîlyonan kesî waşt ke azadîya fizîkî ya Rayberê Şarê Kurdî Abdullah Ocalanî bêra ca û yewîya şarê kurdî virazîyo.
Endama Komîteya Amadekar a Merkezî ya Newroze Sema Koç ke Endama Meclîsê DEM Partî ya derheqê pîrozkerdişê Newroze û mesajanê de ke ameyê dayene, ajansê m rê qisey kerd.
‘Meydan de helwestêko polîtîk bibî’
Sema Koç dîyar kerd ke pîrozkerdişê Newroza emserî bi heyacanêko gird dest pêkerd û no çoş û heyecan vurîya helwestêko xurt. Sema Koç îfade kerd ke şarê kurdî Newroze tena sey şayîyêk nê, sey meydanêko polîtîk vîneno û wina vat: “Binê varan û serdî de zî şar meydan de bî. Şar zano ke seba çi yeno. No hem seba Amedî hem zî seba şaristananê bînan, Newroze zaf cîyayî vetî meydan û sey gamêka newîye bî.”
‘Waştişê azadîya fizîkî ya Rayber Apo ame kerdene’
Sema Koç bale ante waştişo sereke yê şarî yê meydananê pîrozkerdişê Newroze ser o û dîyar kerd ke mesaj û fotografê Rayberê Şarê Kurdî Abdullah Ocalanî her ca de bîyê û vat: “Waştişê şarî o yo ke Rayber Apo êdî bi hewayêko fizîkî teber de bo. Ma zî her meydanî de nê dî; bi ruh, bi fotograf, bi mesaj û bi sloganan şarê kurdî helwestê xo da mojnayene. Emser Rayber Apo bi ruh û mesajanê xo ma reyde bi, la hêvîya ma a ya ke serra vernîya ma de, o bi fizîkî mîyanê ma de bo.”
‘Çar hetanê Kurdîstanî de mesajê yewîye ameyê dayene’
Sema Koç qalê yewîya neteweyî ya şarê kurdî kerd û wina vat: “Çar hetanê Kurdîstanî ra; Rojava, Başûr, Rojhelat û Ewropa ra mesajê yewîye resayê Amed. Ame dîyarkerdene ke bi taybetî badê wayîrvejîyayîş û xoverdayîşê seba destkewteyanê Rojava, waran de wayîrvejîyayîşêko xurt seba yewîya demokratîk û neteweyî vejîya vernî. Nê mesajê yewîye serê şarî de tesîrêko pozîtîf o gird viraşt.”
‘Waştişê aştîyêka domdare est o’
Sema Koç peynîya qiseykerdişê xo de îfade kerd ke pankart, eşkerayî û sloganê meydanan da mojnayene ke waştişê prosesê aştî û komelê demokratîkî serê komelî de tesîrêko pozîtîf viraşto û wina vat: “Sloganê seba azadîye bi yew vengî ameyê vatene û her ca de gulbang da. Ma nê heme bi çoşêko gird dî û goşdarî kerd. Şarê kurdî zerrî ra wazeno ke no proses aver şoro û aştîyêka domdare virazîya.”
