Rejîmê Îranî bêmabên girewteyanê sîyasî darde keno. Eynî çarçewa de ewro di girewteyê sîyasî hepisxaneyê Qizilhesar yê Kerecî de hetê rejîmê Îranî ra ameyê dardekerdene.
Rejîmê Îranî daredekerdişê girewteyanê sîyasî çarçewaya heyfgirewtena vera şerê Amerîka û Îsraîlî bi ca ano û hewldano ke bi nê kerdişan çimanê şarî bitersno ke şar vera zulmê rtejîmî bêveng bimano.
Rêxistina Efûyê Mîyanneteweyî (Amnesty international) bi eşkerayîyêke dîyar kerd ke çar girewteyê bînî yê sîyasî yê bi nameyê Hesen Muntezer, Babek Elîpur, Pûya Qubadî û Wehîd Benî Amiryan Hepisxaneyê Qizilhesar ê Kerecî binê tehlukeyê cezaya dardekerdişî de yê ke bi “serewedaritiş” yenê sucdarkerdene.
Medyaya Îranî eşkera kerd ke ewro serê sibayî di girewteyê sîyasî yê bi nameyê Babek Elîpûr û Pûya Qubadî hepisxaneyê Qizilhesarê Kerecî de ameye dardekerdene.
Vizêrî zî di girewteyê sîyasî Ekber Danişwerkar û Mihemed Teqawî yê ke eynî dewa ra amebî dardekerdene.
Rêxistina Efuyê Mîyanneteweyî (Amnesty international) derheqê dardekerdene girewteyanê sîyasî de eşkerayîyêk vila kerde dardekerdişê girewteyanê sîyasî şermezar kerd û dîyar kerd ke rejîmê Îranî bi goreyê kêfê xo cezaya dardekerdişî pê ano û waşt ke rejîmê Îranî bilez cezaya dardekerdişî bido vindarnayene.
