Cezayîr Kayaye waşîya xo dewa Gomê Dîyarî de ramita. Emrê xo gurîyayiş ra verdo ra, nika qayte kokime xo kena û wina vana: “Ma domanê hardê dewrîşîme, jê gulsosine qaytê kokime xo kenîme.”
Cezayîr Kayaye, verênde weşîya xo dewa Gomê Dîyarî ya ke girêdayeyê Dêrsimîya de ramita. Dewa xo de feqirîye bîya, cîranan bar kerdo şîyê Erzingan. Înan kî bar kerdo şîyê dewa Erzinganî Mollakoy. Cezayîr Kayaye, karê dewa verêne û qaytecîkerdena kokima xo ser ma rê qisey kerd.
‘Ma zerê karî de xelas nêbeme’
Cezayîr Kaya, karê dewa xo verêne ser qisey kena û wina vana: “Dewa ma Gomî Dîyar bî. Verênde, kar zaf bî. Dewar weye kerdêne, şîyêne malî, vas çînitêne, mal dîtêne, vas lode kerdêne, ron û toraq dêne arê, avrênc têwdêne, toraq kerdêne postik, do sanitêne, zerê çeyî pak kerdêne, zilvê axure eştêne, nûn potêne, hêgayî ramitêne, karê cinîkû zaf bî, zerê çeyî, teber ma serde bî. Ma her çî zerê çeyî de vetêne. Zimistan kî towa teber de nê ardêne. Wisar ra hatanû payîzê peyênî kar kerdêne. Zimistan ke ame kar tenê bîyêne senik. Zimistan ke ame, kokimanê ma, ma rê sanikî vatêne. Rozê Xizirî de roje guretêne, îtîqatê ma zaf bî, qaytê aynê nêkerdêne. Pîyaz û goşt nêwerdêne. Payîz şîyêne jîyare ser. Wisar Hewtemal de şîyêne jîyare, nîyaz potêne. Nameyê jîyaranê ma, Hewşa Kertî bî, Asil Bava bî.”
‘Kokime harde dewreş mare qilavûza’
Ju kokima Cezayîr Kayaye est a û mîyanê ciland de ra. Qaytê kokima xo kena û mîyanê qiseykerdîşe xo yê peyênî de vana “Ma domanê hardê dewrêşîme, kokimê ma raştîya ma yê.” Wina domnena: “Ez hetê ra karê zerê çeyî kon, hetêra, qaytê kokima xo kon. Kokimanê xo rê hurmet bikerîme. Rindek qaytê cî kerîme, pak qaytê cî kerîme. Înû zon û îtîqatê ma yê, înû ra hes bikerîme ke, heq ma ra hes bikero. Jîyarê ma, kokimanê marê embaz bê. Kam ke qaytê pîlûnê xo, kokimanê xo keno, raya înû rakerdeyîya. Înû Kirmancîya ma yê. Hard û asmên înû ser roştîye bîya ro.”
