Kovara Komînal ke aşma vîyarte de Ewropa de dest bi weşanî kerd, hûmara xo ya dîyine bi manşetê “Modernîteya demokratîke serdemê şorişê cini yo” weşanaye. Kovare seke verê zî vatbi, hîrê hûmaranê xo yê destpêkî de do Manîfestoyê Komelê Komînal ê Demokratîk beş bi beş biresno wendoxan.
Beşanê manîfestoyî yê neweyan tede ca girewt
Komînal hûmara xo ya dîyine de bi giranî beşanê 4. û 5. ê Manîfestoyî re aqitnayê. Na çarçewa de sernuşteyê sey “Modernîte” û “Rewşa bi pirsgirêk a li Rojhilata Navîn û Çareseriya Modernîteya Demokratîk” ke beşanê 4 û 5. ê manîferstoyî ra yenê pê, tede ca gênê. Manîfesto de sernuşteyê kapîtalîst, netewe-dewlete, konfederalîzmo demokratîk, modernîteya demokratîk, neteweya demokratîk, komelo exlaqî û polîtîk, xopawitiş, zayendîperestî, eko-endustrî û tarîxê dînan bi hewayêko hîra erjnayê.
Kovare bi pêroyê 20 rîpelan ra yena pê. 15 rîpelê aye zî Manîfesyo rê ameyê aqitnayene. Sewbîna kovare de hedîseyê sîyasî û erjanayîşî zî ca gênê. Na çarçewa de nuşteyê Mustafa Karasu yê bi sernameyê “Helwesta di Newrozê de hate nîşandan aqlê hevpar ê Kurdan e” ame weşaneyene.
Kapako peyên ê Kovara Komînal de zî şîîra bi nameyê “Newroz Nakem” a Abdullah Peşêw ameye weşanayene. Şîîre bi lehçeyanê sorankî û kurmancî yê Kurdkî ameye weşaneyene.
