Ebdulmecît Yuksekbago ke serra 1993î de amebî destbendkerdene û hetê Dadgeha Emnîyetê Dewlete (DGM) ra cezaya hepsê ebedî amebî dayene, 33 serran ra dima 8ê nîsane roja çarşemeyî azad bî.
Hepisxane ra vejîyayîşî ra dima ver bi welatê xo kewt rayîr û seba Yuksekbagî nehyaya Comanîye ya qezaya Hawêlê ya Sêrtî de pêşwazîyêka girseyî virazîyaye.
Pêşwazîya Yuksekbagî de endamê Komela Hetkarîdayîşê Keyeyanê Tepîşteyan (TUAY-DER), temsîlkarê partîyanê sîyasîyan, keyeyê ci û zaf hemwelatîyî beşdar bîyî.
Ebdulmecît Yuksekbag dewrê 1993î de Sêrt de amebî tepîştene. 33 serranê tepîştîya xo de bi rêze hepisxaneyanê Êlih, Xarpêt, Semsûr, Riha û peynîye de Erzingan rê amebî şawitene.
