Hêrişê Îsraîlî vera Lubnanî de ke vizêrî ame kerdene, tewr tay 250 kesî cuya xo ra bîyê û bi hezaran kesî zî birîndar bîyê. Taybetî Beyrûd de bi desan bînayî ameyê rijnayene û şaristan bîyo warê şerî.
Wexto de ke adirbestê di hewteyan ê mabênê DYA û Îranî kewt pratîk, artêşa Îsraîlî vera Lubnanî bombardumanêko zaf gird viraşt. Hêrişanê peyênan de ke zafê înan Beyrûd de virazîyayê, zafêrê 250 kesî cuya xo ra bîyê.
Hêrişê serê Beyrûdî û agahîyê peyênî
Goreyê agahîyanê peyênan teyarayanê şerî yê Îsraîlî bi hawayêko xirab taxê Beyrûd û xeylê cayê Lubnanî bombarduman kerdê. Netîceyê nê hêrişanê çetinan de, bîlançoyê merdan 250 kesî derbas bîyê û bi hezaran kesî zî birîndar bîyê. No hêriş sey derbeyo tewr giran ê Îsraîlî yê heta nika yeno namekerdene.
Îran: Muzakereyê Washingtonî reyde ‘maqûl nîyê’
Badê nê hêrişanê çetinan, Tehranî ra eşkerayîyêka huşke ameye. Rayedaranê Îranî dîyar kerd ke semedê zêdebîyayîşê hêrişanê Îsraîlî nê wextî de dewamkerdişê muzekerayanê Washingtonî reyde maqûl nîyê. Ame dîyarkerdene ke hêrişê wextê adirbestî de cehdanê dîplomatîkan bêmana kenê.
DYA heta nika vera hêrişanê ke binê sîwanê adirbestê înan de virazîyayê, bêvengîya xo paweno.
