Tîyatroyê Şaristanî yê Şaredarîya Girde ya Amedî bi kaye “Moraşîn”vajîyayîşê kevnaran ê kurdkî anê sehnî ser. Kaye ke pey şopê heskerdişî, xoverdayîş û ravurîyayîşî ya do 23ê nîsane de çarçewaya 11. Festîvalê Tîyatroyî yê Amedî yo Mîyanneteweyî de vejîyo vernîya temaşekerdoxan
Tîyatroyê Şaristanê Şaredarîya Girde ya Amedî (DBŞT) ke binê banê Serekîya Daîreya Kultur, Huner û Karanê Komelî de xebatanê xo ramenê, bi berhemê xo yê newî “Moraşîn” amadekarîya vejîyayîşê vernîya temaşekerdoxan kenê. Kayêka hetê rejîsorê Tîyatroyî yê Îranî Ghotbedîn Sadeghî ra ameyo nusîyene û rejîsorîyê ey ameyo kerdene. Do çarçewaya 11. Festîvalê Tîyatroyî yê Amedî yo Mîyanneteweyî de reya verêne (promîyer), bêro kaykerdene. Berhemo ke nêzdîyê 50 kesê kaybazî û kaykerî reyde yeno kaykerdene, bi ziwanêko xurt ê sehnî û performansêko bi heybet yeno vernîyê heskerdoxanê hunerî.
Sadeghî ke bi kaye “Spîmend” yê DBŞT’î amebî naskerdene na hewe bi kaye “Moraşîn” 23ê nîsane de Merkezê Kultur û kongreya ÇandAmed de reya verêne do vejîyo vernîya ewnîyayoxan.
Kadroyê kaybazan
Şanoger Nûrşen Adiguzel, Yavûz Akkûzû, Nazmî Karaman, Rêzan Kaya, Leyla Batgî, Omer Şahîn, Sena Ozbey, Erhan Mîr, Mesût Erencî, Şehabettîn Dag, Salîh Yildizoz, Şahperî Alphan, Perînaz Delazy, Mehmet Veysî Yoldaş, Eyup Kan, Havva Akçîçek, Şevîn Yel, Sadettîn Înal, Omer Akkan, Halît Aslan, Şiyar Yaşa, Nurcîhan Yilmaz, Gulşen Yaşar û Meryem Turk di kadroya lîstikê de cih digirin.
Sewbîna zî kaykerî Kayê Gelerî yê KASED’î zî do bi performansê xo sehnî ser o bê.
Rîtuelê kevnarî
“Moraşîn” sey adapteyêke dramatîk ke destanê kurdkî yê “Genc Xelîl” ra ameyo girewtene, vejîyeno sehnî ser. Hîkaye de dûrkewtişê Genco û waştîya ey Moraşîn a ke semedê şer û xizanî dest pêkeno; Moraşîn seba ke bireso waştîya xo çewres cinîyê reyde kincanê camerdan danê xo ra û kewenê rayîr. Moraşîn rayîr de hewt qonaxanê ke bi rîtuelanê kevnar ameyê munîtene ra derbas bena.
Na raywanî tena hîkayeyê resayîşî nîya, eynî wextî de sey vajîyayîşêke ravurîyayîşî yo bi rîtuelanê kevnar ameyo munîtene. Her qonaxê ke Moraşîn tira derbas bena sey warê rîtuelêke yena mojnayene û têkoşînê karakterê yê zereyî û komelî xorîn beno.
Kaye ke heskerdiş, fedakarî, xoverdayîş û motîfanê mîtojîk mîyanê xo de hewênena, serkaraktera Moraşîne ra cesaret û xoverdayîşê cinîya kurdî dana mojnayene û bi raya rîtûelan amanc kena ke mabênê vîyarte û ewro de pirdêke xurt awan bikero.
