Serdar Daniş û Ebubekîr Denîz 24 serrê verê qereqolê cendirmeyan vînî bîyê û malûmat înan ra nîno girewtiş. Şuayîp Taniş ard ziwan ke kiştoxê lajê ci Serdar Taniş û embazê ci Ebubekîr Denîz fermandarê cendermeyan Levent Ersoz o û 24 serrê hema zî nêameyo cezakerdiş.
Serrê 90î de Kurdistanê Bakûrî de bi hezaran kes ameyê destbendkeriş û peynî zî ameyê vînîkerdiş. Kesê ameyê vînîkerdiş zî nêameyê dîyîş û kiştoxê înan zî nêameyê cezakerdiş. Înan ra yewe zî Serekê HADEP’î yê Silopî Serdar Taniş o û yewe zî Rayedarê HADEP’î yê Silopî Ebubekîr Denîz o.
Serdar Taniş û Ebubekîr Denîz 25ê Çeleyê 2001î de ameyê destbendkerdiş û peynî zî ti malûmat înan ra nêame girewtiş. Şik û guman bî ke vînîkerdişê înan de Fermandarê Lîwa yê Cendirmeyan ê Şirnexî yê ci demê Levent Ersoz verpirsîyarî zî heqê ci de ti cipersayiş ameyê destpêkerdiş.
Keyeyê Serdar Taniş û Ebubekîr Denîz seba aqubetê înan bêrê zanayiş û kiştox bêrê cezakerdiş doz û dewa akerdê la dewayê ameyê akerdişî ra zî netîce nêame girewtiş. Keyeyan serî Mahkemeya Heqe Merdiman a Ewropa da û Mahkeme 2ê Tebaxa 2005î de Tirkîya mehkum kerd ke tazmînat bida keyeyan. Tewro peynî zî avûkatê keyeyan seba aqûbetê Serdar Taniş û Ebubekîr Denîz bêro zanayiş û kiştox bêrê ceza kerdiş 7ê Çeleyê 2020î de serî Mahkemeya Ewropa da la hetanî nika Mahkemeya Ewropa ti verpers nêda.
Bila kiştox bêrê cezakerdiş
Pîyê Serdar Tanişî, Şuayîp Taniş ard ziwan ke kiştoxê domanê ci dîyar ê zî nêameyê cezakerdiş û wina domna: “Dima qewimyayiş çapemenî de zî vila bî, ma rê vatê 2 cenaze Kerboran de yê. Ma DNA’yê xo da. Heta nika ma nêeşkîyayî ti netîceyêkî bi dest visnê. Her serre ma waştişê cenazeyê xo kenê. Hetanî nika aqubetê înan dîyar nêbî. Tena waştişê ma o yo ke esteyê ma bidê ma û kiştoxê înan zî ceza bikê.”
