Pîyê Rojîn Kabaîş a ke bi guman cuya xo ra bîbî, Nîzamettîn Kabaîşi dîyar kerd ke ewilî walî, rektor û dozgerî, heme wezîfedarî zanenê çi ameyo serê kênaya mi la wazenê dasya binimnê. Nîzametîn Kabaîş veng da û vat ganî komîsyonêko xoser bêro awankerdene.
Unîversîteya Yuzuncu Yilî ya Wanî de 27ê êlûla 2024î de wendekara beşê mamosteyî Rojîn Kabaîş vîndî bîbî. Cenazaya Rojîn Kabaîş badê 18 rojan qeraxê Gola Wanî de amebî vîyanîş. Seba Rojîn Kabaîş Kurdîstan û xeylê şaristananê Tirkîya de dezgeh û welatijan çalakîyî organîze kerdê û hemverê nezelalkerdişê hadiseye de reaksîyonê nîşan dayê. Mergê Rojîn Kabaîş o bi guman heta nika nêameyo zelalkerdene. Persê derheqê di camêrdan de yê ke raporê Sazgeha Tibö Edlî (ATK) de amebî tespîtkerdene, hema zî nêameyê cewabkerdene. Ame zanayîş ke raporo îlawe yê baroyanê Amed û Wanî, pawitoxanê keyeyê Rojîn Kabaîşe û Wezaretê Edaletî ATK’e ra waştibi, ey zî îlaweyê dosyaye bîyî. Pîyê rojîn Kabaîşe, Nîzamettîn Kabaîş derheqê prosesê cipersayîşê kênaya xo de ajansê ma rê qisey kerd.
‘Rektor û ewleyî berpirsîyarê hadîse yê’
Nîzamettîn Kabaîş diyar kerd goreyê agahîyanê ke şarê herême û wendekaran ra girewtê, gumanan benê serö rektor û xebatkaranê ewlehîye û wina vat: “Rektor, walî û dozgerî heme zanê se bîyo. La nêwazenê eşkera bibê. Yeno vatiş ke hetkarê rektor û xebatkaranê ewlehîye mîyanê na hadîse de yê. Seba ke rektor bi hêz o, bandorê emnîyet û edlîye ser o keno ke dosya bigrê.”
‘Şahîdî yenê tehdîtkerdene’
Nîzamettîn Kabaîşî ard ziwan û vat kesê ke waştêne bibê şahîd hetê polîsan ra ameyê destbendkerdene û tehdîtkerdene û wina dewam kerd: “Camêrdêk karsazî vat ‘ez do her çî vajî’ şi îfade da la dozgerî ey goştarî nêkerd. Eksê ci ey destbend kerd û şewêk nezaretî de mend û ame tehdîtkerdene ke qisey nêkero. Dewêke ey doran de ya de cinîyêke zî dîbî erebeyêke sipî ameya o cayê ke Rojînî vîndî bîbî. Bi 1 erebeyanê dekerde însan şewe şinê verê bere a cinîye û aye tehdit kenê ke îfade nêdo.”
‘Raporanê ATK de nakokîyî est ê’
Pîyê Rojîn Kabaîş Nîzamettîn Kabaîş bale ante kêmanîyanê raporê otopsî ser o û wina dewam kerd: “Vanê awe de xeniqîyaya, la pişika aye de awe çinibî. 18 rojî awe de menda la raporanê zelalan nêdanê ma. Dozgerî ATK’yî yê Stenbolî sûcdar keno, ATK zî dozgerî sucdar keno. Ma raporanê texmînî ney, fermî wazenê.”
‘Nameyê Rojîn zî bi sebebê polemîke’
Nîzamettîn Kabaîşî ard ziwan ke wezîfedaran ey ra persê “To çi ra nameyê kênaya xo kerdo Rojîn?” kerdo. Nîzamettîn Kabaîşî dîyar kerd ke no nêzdîbîyayîş nîşan dano ke polîtîkayê hemverê nasnameyê kurdkî na dosyaye de zî est ê û wina domna: “Rojîne roj a, tîj a. Gulîstan Doku û Rojîn her di zî wendekar bîbî, her di zî mamoste bîbî û nameye her diyan zî bi kurdkî bi. Qederê înan zî sey yewbînan bî.”
Vengdayîşê têkoşînî
Nîzamettîn Kabaîş peynîya qiseykerdişê xo de dîyar kerd ke ê do fek dewaya kênaya xo ra veranêdê û vat: “Ez tehdîtan ra nêtersena. Senî keyeyê Gulîstan Doku 6 serre lingan ser o yo, heta ke faîlî nêrê vînayîş ez do xover bidî. Ganî sînyalê telefonê yê a şewe bêrê cigêrayîşkerdene û komîsyonêko taybet seba na dewa bêro awankerdene.”
