Pîyê Rojîn Kabaîş, Nîzamettîn Kabaîş ewro şî zîyaretê keyeyê Gulîstan Doku û balê ante serê hedîseyê Gulîstan Doku û kênaya ey Rojîn Kabaîş û vat: “Ma fek ci ra veranêdanê.”
Çarçewaya cipersîyaşî dewaya Gulîstan Doku de 13 kesê ke amebî destbendkerdene ra 10 kesî ameyê girewtene û walîyê ey demî yê Dêrsime Tuncel Sonel û sertabîbê eynî demî yê nêweşxaneyê dewlete yê Dêrsimî Çagdaş Ozdemîr hema zî destbendkerdeyê. Keyeyê Doku vernîya edlîyeyî de yê, pîyê Rojîn Kabaîş Nîzametîn Kabaîş ke kênaya ey Wan de bi hawayêko bi guman cuya xo ra bîya ame zîyaretê keyeyê Gulîstan doku.
‘Ma fek ci ra veranêdanê’
Kabaîş, zîyaret de reyna waştişê xo yê edaletî ard ziwan û vat: “Meclîs wa ma temaşe bikero û destê xo bido serê wijdanê xo. Hîna keyeyê mexdurî yê cîyaye est ê. Nê di serran de ma dejê giranî antî. Cipersayîşê ma de rektor û gişta merdimanê ey zî tede est a ez zana. Liv û têgêrayîşê ey de dîyar o. Nêame şînê ma. Ma domanê xo teslîmê ey kerdî. Ganî bivatêne ‘nê domanê ma yê’ la derheqê Rojîne de yew vateyek zî nêvat. Eynî çî babeta Gulîstan Doku de zî virazîya. Ma do fek ci ra veranêdanê.”
Dejê domanan ê her di keyeyan yew o
Nê mabênî de dayîka Gulîstan Doku, Bedrîye Doku ameye verê Nîzametîn Kabaîş û wexto ke bermayene bi vatena “Derdê nê erdan yew o” yewbînî verar kerd. Pîy Kabaîş wina dewam kerd: “No keye bî 6 serrî nê dejî anceno. Belkî seyan reyan nê reayn de şî û ameyê. Ma zî eynî rewşe de yê. Ma zî şinê Wan û yenê û nê dejî ancenê. La ne walî ne zî rektor xo rê nêkenê derd. Dozgerî verê cû tu çîyek nêkerd. Dozderê dîyina zî 6 aşmê verênî hinî baş bî. Tayê çî kerdî. DNA ameyê tespîtkerdene la ey zî çîyek nêkerd. Halê hazirî de nika tu çîyek nêyeno kerdene. Nê 6 aşmîyo dosyaya Rojîn Kabaîş de tu çîke nêyeno kerdene. Dosya ameya vindarnayene. Tena vanê hêvîyê akerdişê telefonî yê.
Walîyê Wanî paştî dayene rektorî û unîversîte. Mi ra vatêne kênaya to întîhar kerdo, tu sucê unîversîte çin o. Badê otopsî mi kênaya xo ambulanse de dî. Mi ra qirîyane û vatênê ‘Kênaya to întîhar kerdo’ Wayîrê domananê ma nêvejîyayê û sero zî dejê ma girantir kenê. No keye bî 6 serrî dej anceno. Wele sereyê şima ro bo. Înşela do cipersîyayîşê ma de zî rastî vejîyo meydan. Wa dosyaya ma zî bêro roşnkerdene. DNA’yê di merdiman est a. Eynî çî seba Gulîstan doku ame kerdene.”
Ez esteyanê kênaya xo wazena
Badê ra zî dayîka Bedrîye Doku qisey kerd û wina vengdayîşê serekkomar û wezîrê edaletî kerd: “Ez esteyane kênaya xo wazena. Wexto ke çîyêke ardê sereyê kênaya mi ma şerm kenê. Înşela kiştoxê kênaya ey zî bêrê veten û cezaya muebbetî ro înan bêro birnayene. Waya Gulistan Doku, Aygul Doku zî vat: “Bawerî ma est a ke gorê aye zî bivînê. Ma na bawerîde yê do cezaya tewr girane înan rê zî bêro birnayene.”
