Festîvala Tîyatroyî ya Mîyanneteweyî ya Amedî ya 11. ke hetê Şaredarîya Amedî ya Şaristanê Girdî ra mîyanê tarîxanê 22ê nîsane-2ê gulane de bi temaya “Seba Aştî Dîyalog” yena organîzekerdene, meşte bi beşdarîya Hemşaredaran Serra Bucak û Dogan Hatunî dest pêkena. Festîvala ke grûbanê tîyatroyan ê 19 dewletan ana têhet, 10 rojî dewam kena û şaristanî do bikero pêdîyayîşêkê hunerî yê zafziwanî û zafkulturî.
Festîvale de ke bi kordînasyonê Tîyatroyê Şaristanî yê Şaredarîya Amedî ya Şaristanê Girdî (DBŞT) yeno bicaardene, bi pêroyî 22 kayî do bêrê sahnekerdene. Zaf nawitişî Merkezê Kultur û Kongreyî yê Çand Amedî de yenê kerdene, tayê performansî zî waranê akerdeyan de do beşdaran reyde bêrê têhet. Festîvale de ke heme çalakîyî bêpere yê, bilêtî seba vernîgirewtişê pêserbîyayîşê îhtimalî, do tatbîqê BANbîletî reyde bêpere bêrê girewtene.
Programê festîvale tena bi sahne sînordar nêmaneno. Çalakîyê ke bi musayîş, panel, atolye û pêdîyayîşê hunermendan mirdîya xo pirr ê, beşanê cîyayan ê tîyatroyî anê têhet û şaristanî rê atmosferêko ganî yo kultur-hunerî danê qezenckerdene.
Beşdarîya 19 dewletan
Grûbê tîyatroyan ê 19 dewletan ke Îtalya, Swîsre, Îran, Sûrîye, Tunus, Erebîstana Siûdîye, Filistîn û Ukrayna zî mîyan de yê, do eynî sahne pare bikerê. Festîval amanc keno ke bi rayîrê berhemardişê hunerî mîyanê cografyayanê cîyayan de dîyalog bêro ronayene û têkilîyê mabênê kulturan hîna xurt bibê.
Akerdişê festîvale, roja 22ê nîsane çarşeme saete 19:00î de Konaxê Cemîlpaşa Muzeyê Şaristanî de do bi resepsîyonî bêro kerdene. Akerdişî de ke qiseykerdişê Hemşaredarê Şaredarîya Şaristanê Girdî Serra Bucak û Dogan Hatunî û Serekê ITI Jessica Kaahwa do ca bigîrê, nîşandayîşê dansî yê grûba Uganda Kyente Cultural û govendê şaranê kurdan do bêrê sahnekerdene.
Festîvalo ke bi temaya “Seba Haştîye Dîyalog” yeno organîzekerdene, hêzê tîyatroyî ke mîyanê kulturanê cîyayan de pirdêk roneno, vîrê komelkî gandar keno û demê krîzan de veng vejeno. Festîval amanc keno ke tîyatro sey ziwanêko hempar û zemînêkê piştîpêdayîşî bêro xurtkerdene.
Festîval hunermendan ra teber akademîsyenan zî ano têhet. Beşanê tîyatroyî yê unîversîteyanê Berlînî, Sudanî, Ukrayna, Sulêmanîye û Duhokî ra do beşdarî bibê. Kayî do bi sernuşteyê tirkî, kurdî û îngilîzkî bêrê sahnekerdene.
Sewbîna wendekarê lîsansê berzî yê unîversîteyanê Berlînî zî do festîvalî çarçewaya xebatanê akademîkan de taqîb bikerê.
Şima eşkenê programê Festîvalê Tîyatroyî yo Mîyanneteweyî yê Amedî yê 11. adresa https://amedtheatrefest.org/ ra xo biresnê ci.
