Goreyê zanayîşanê ke selahîyetdarê DEM Partî dayî; tecrîdê serê Rayber Apoyî dewam keno la Rayber Apo semedê înşakerdişê modelê pîya ciwîyayîşî yê vera mudaxaleyê hegemonî cedh keno û na xete de israr keno.
Wekîlê DEM Partî Pervine Buldan û Sirri Sureyya Onder ê ke Heyetê Îmraliyî de ca genê 22ê çeleyî de Rayberê PKK’î Abdullah Ocalan reyde pêvînayîşê diyînî kerd. Heyetê Îmraliyî dima ra derheqê pêvînayîşê çar saetan de zanayîş da îdareyê DEM Partî.
Selahîyetdarê DEM Partî Muxabîrê Ajansê Mezopotamya (MA) Mehmet Aslanî rê qala detayanê pêvînayîşî kerd. Goreyê xebere pêvînayîşê diyînî de selahîyetdarê ke dewlete zî ca girewt.
Dîya zanayene ke tepişteyê bînî ke Îmrali de yê Omer Hayrî Konar, Hamili Yildirim û Veysi Aktaş tewrê pêvînayîşî nêbîyî la ê Abdullah Ocalanî reyde yenê têhet û pîya xebityenê.
Goreyê xebere, heyet pêvînayîşê diyînî de qala qewimîyayîşanê peyînan kerd. Heyetî qala eşkerayîyanê KCK û PKK’î kerd ke badê pêvînayîşê verênî ameyî kerdene. Derheqê tecrîdî de nê ameyî vatene: ”Birêz Ocalan mîsyonê tarîxî dewlete rê bar keno. La semedê raştkerdişê şertan qet gamêke nêerzîyena. Tecrîd nîno wedaritene. Birêz Ocalan xora şertan sey meseleya şexsî nêvîneno. O nêvano proses ça de yo, vano senî netîce geno. Ma zî ewro eynî çî vanê.”
Ame vatene ke Rayberê PKK’î pêvînayîş de ard ziwan ke averberdişê zemînê muaqeşekerdişî yê bi dewlete muhîm o. Pêvînayîşî ra nê zanayîşî ameyî parekerdene: ”Ocalan muhîm vîneno ke na mesele zemînê meclîsî de ya. Reyna zaf cehd keno ke proses pozîtîf netîce bibo û wina hîşyar keno: ‘Netîceyo posîtîf û negatîf yê prosesî do her kesî ser o tesîr bikero.’ Kam ke paştî dano prosesî înan rê selam û heskerdişê xo şaweno.”
Pêvînayîş de behsa vengdayîşê ”çeke ronayîş” zî ame kerdene. Ame vatene ke Rayberê PKK’î cehd keno ke problem bi temamî zemînê şîdet û pêkewtişî ra bêro wedaritene û problem pîya bi sebebanê xo werte ra bêro wedaritene û semedê ne zaf xebityeno.
Selehîyatdarê DEM Partî derheqê ”çeke ronayîşî” de wina vat: ”Zaf muhîm o ke sebebê problemî werte ra bêrê wedaritene. Eke wina nêbo, yew problem qedîyen, problemo bîn dest pê keno. Nika Îmrali de têna na bebete ser o nîno munaqeşekerdene. Îqtîdar keno bi na rewşe pozîsyonê xo vejo vernî.”
Ame vatene ke pêvînayîşê diyînî ra heme Rayberê PKK’î hem zî Heyetê Îmraliyî dahîna zaf hêvîdar ê; reyna derheqê pêvînayîşê Heyetê DEM Partî de zî ame qiseykerdene. Selahîyetdarê DEM Partî ard ziwan ke no pêvînayîş eşkeno sey pêvînayîşêkê hazirkerdişî bêro namekerdene û vat Birêz Ocalan do erjnayîşê xo yê nê temasan û mesajê xo yê seba Têgêrayîşê Kurdan pêra pare bikero.
Selahîyetdarê DEM Partî derheqê pêvînayîşî MA rê nê vatî: ”Goreyê netîceya pêvînayîşî Birêz Ocalan seba ke verê emelanê emperyalîsan ê vera Iran, Irak, Sûrîye û Tirkîya bigîro gurîyeno. Birêz Ocalan gurîyeno ke wa Gazze û Bexdadê neweyî mebê. Cehd keno ke şaran bipawo. Cehd keno ke Tirkîya mekanîzmaya darbe û sîstemê huqûqî yo ke demokratîk nîyo ra bêro xelisnayene.
Amerîka û Îsraîl hinî cîranê Tirkîya yê. Destê Amerîka de semedê meseleya kurdan çare çîn o. Birêz Ocalan semedê înşakerdişê modelê pîya ciwîyayîşî yê vera mudaxaleyê hegemonî cedh keno û na xete de israr keno. Vano ya çareserîya mi ya zî çareserîya Amerîka. Birêz Ocalan 93 de ça de bi hema ûca de yo. Rexne û xorexnekerdişê vîzêrî keno.”
Selahîyetdarê DEM Partî ard ziwan ke o paweno ke pêvînayîşê hîrêyinî zî bêro kerdene û vat: ”îqtîdar vano ganî semedê çareserîye tay gamî bêrê eştene la gamêke nêerzeno. Ganî narey mesela bi metodanê demokratîkan bêra çarserkerdene. Ma sey DEM Partî pawenê ke îqtîdar gamanê pozîtîfan û pêtan bierzo. Heyetê Îmraliyî vat beno ke ê meclîs de rayberanê partîyanê sîyasîyan reyde pêvînayîşê diyînî bikero. Reyna do pabesteyanê Îetîfaqê Kede û Azadîye reyde zî pêvînayîşî bêrê kerdene. Ma zî do sey tim çîyo ke bikewo milê ma,ma do bikerê.”
