Heyetêke partîyanê sîyasî ra ke bi rayîrê avûkatan Selahattîn Demîrtaş û Selçuk Mizrakli reyde pêvînayîş viraşt, vernîya Hepisxaneyê Edîrne de eşkerayîya çapemenî daye û waşt ke îqtîdar bilez game bierzo û girewteyanê sîyasîyan serbest verado.
Komîsyono ke DEM Partî, CHP, EHP, EMEP, TÎP, TOP û temsîlîyetanê DEM Partî ra ameyêne pê bi raya avûkatan Hepisxaneyê Edîrne de Hemserekê Pêroyî yê verên ê HDP’yî Selahattîn Demîrtaş û Hemşaredarê Amedî yê verênî Selçuk Mizrakli reyde pêvînayîş viraşt. Pêvînayîş bi raya avûkatanê Selahattîn Demîrtaş û Selçuk Mizrakli ame viraştene. Badê pêvînayîşê avûkatan mesajê Demîrtaş û Mizrakli bi hewayêko nuştekî heyetî rê erşawit. Badê pêvînayîşî vernîya hepisxaneyî de eşkerayî ameye dayene. Hemserekê Pêroyî yê DEM Partî Tuncer Bakirhan, Serekê Pêroyî yê partîyanê sîyasî, avûkatê Selahattîn Demîrtaş, rêxistina DEM Partî yê Edîrne û xeylê welatijî tewrê eşkerayî bîyê.
Serekê EHP’yî Ozturk: Ma wazenê gamêka muhîme bierzê
Serekê Pêroyî yê EHP’yî Hakan Ozturk ewilî qisey kerd û dîyar kerd ke ey ewro seba akerdişê berê aştî ameyê vernîya Hepisxanayê Edîrne û vat: “No serrêk o proses est o. Ewro seba dayîşûgirewtişî Selahattîn Demîrtaşî ma ameyê tîya. Rewşe êdî musaîd a, ma wazenê gamêka muhîme bierzê û raya agêrayîşê verê cû bigîrê. Na game seba prosesî muhîm a.”
EMEP: Ganî dewlete game bierza
Serekê Pêroyî yê EMEP’î Seyît Arslanî zî dîyar kerd ke no 10 serrî yo embazê înan tîya de yenê girewtene û wina qisey kerd: “Ma vengdayîşê aştî kenê. Embazê ma bi maneyan yenê girewtene. No welat nê çîyan heq nêkeno. Ganî dewlete game bierzo û qeraranê MHME’yî bi ca bîyaro. Seba aştî hewceyî efûyêko sîyasî est a.”
CHP: Ganî qerarê MHME’yî bêrê caardene.
Dima ra Cagirê Serekê Pêroyî yê CHP’yî Gul Çîftçî qisey kerd û nê çîyî vat: “Ewro şaredarî bi operasyonanê sîyasî yenê girewtene. Îktîdar bi sindokan nêeşkeno muxalefetî binfîno. Seba ey operasyonanê sîyasî virazeno. Babete weçînayîş nîya babete aştî ya. Ganî qerarê MHME’yî bêrê caardene. Hewcedarîya nê welatî teda nîya ameyoxêko hempar o.”
Bakirhan: Dewlete samîmî bo ganî gaman bierzo
Dima ra Hemserekê Pêroyî yê DEM Partî Tuncer Bakirhan qisey kerd û dîyar kerd ke Tirkîya de xeylê babetî est ê la her kes ro edalet gêreno û wina vat: “Raporê Komîsyonê Meclîsî de zî no gêrayîşê edaletî yeno ziwan. Eke dewlete samîmî bo gama yewine caardişê qerarê MHME’yî yo. Kesê ke edalet gêrenê çi rê hepisxaneyan de yê. Nê kesê girewteyî bêrê veradayene zî nêşinê tu cayan. Semedê ke nê welatî ra hes kenê û do seba prosesî bixebitîyê. Aştî bê Fîgen Yuksekdag û Selahattîn Demîrtaş nêbena. Ganî bilez girewteyê sîyasî bêrê veradayene.”
Baş: Girewtişê her sîyasetmedarêkî binpaykerdişê heqê şaran o
Serekê Pêroyî yê TÎP’î Erkan Baş zî îfade kerd ke sîyasetmedar bi destê îqtîdarî ameyê girewtene û wina dewam kerd: “Her roje sîyasetmedarêkî rê kumpas virazîyeno. Girewtişê her sîyasetmedarêkî yeno manaya binpaykerdişê heqê şaran. Peynî de Meclîsî de komîsyon ame awankerdene û vat qerarê mehkema û MHME’yî nêyeno caardene. Destpêk bi caardişê qanûno bingeyin est a.”
Badê qiseykerdişan eşkerayî qedîya.
