Turnuvaya Voleybolî ya cinîyan a 2. ke hetê Mudurîyetê Ciwanan û Sporî yê Şaredarîya Peyasî ra ameye organîzekerdene, bi kaykerdişê maçê fînalî qedîyaye û madalya û xelatî ameyê dayîş.
Turnuvaya Voleybolî ya cinîyan a 2. bi beşdarîya 21 taximan ameye organîzekerdene. Amancê na turnuva bi rayîrê sporî cinî bêrê têhet û hêzê yewîye xurtêr bikerê. Turnuvaya ke bi maçê fînal ê mabenê Peyas Cinî û Komunê Sporê Azade de amebi organîzekerdiş, qedîya. Maçî de Komunê Sporê Azad ser kewt û bi şampîyon. Seba taximo ke bîyo şampîyon merasîmê xelatdayîşî ame organîzekerdene.
Hemşaredarê Peyasî Cengîz Dundar, Hemserekê Komela Rojnamegêran a Dîcle Firatî (DFG) Selman Çîçek û xeylî kesî beşdarê merasîmî bîyî. Hemşaredar Cengîz Dundar û beşdaran şampîyonê turnuvaya Komunê Sporê Azad pîroz kerdê û kûpa, madalya û xelatî dayê taximê serkewteyî. Merasîm bi girewtişê fotografan qedîya.
