Platformê Kede û Demokrasî yê Amedî seba mîtîngê 1ê Gulane yê Meydanê Îstasyonê vengdayîşê tewrbîyayîşî kerd û dîyar kerd ke heta aştî nêbo kede azad nêbena.
Platformê Kede û Demokrasî yê Amedî bi munasebetê 1ê Gulane Roşanê Karker û Kedkaran ê Dinya bînaya DÎSK-Îş yê qezaya Peyas ê Amedî de kombîyayîşê çapemenî viraşt. Kombîyayîş de bi sloganê “Seba Komelê Demokratîk ma bi kede ver bi azadî şinê” ame viraştene de xeylê temsîlkarê sazgehê sivîl yê komelî amade bî.
‘1ê Gulane tena roşanêk nîyo ’
Hemserekê Şubeyê DÎSK Genel-Îş ê Hûmara 2. ê Amedî Behçet Barût nameyê platformî ser qisey kerd. Behçet Barût dîyar kerd ke krîzê ekonomî, karo ne ewle û enflasyonî kedkarî vistê mîyanê şertanê giranan û vat: “1ê Gulane tena roşanêk nîyo, eynî wextî de ‘Venga seba hesabpersena tarîxî û ravurîyayîşî yo.”
‘Heta ku aştî nêbo, kede azad nêbena’
Behçet Barût da zanayene ke 1ê Gulane yê emser mîyanê atmosferê “Aştî û Komelo Demokratîk” ê Rayberê Şarê Kurdî Abdullah Ocalan pêşwazî kenê. Behçet Barût dîyar kerd ke têkoşînê kede û aştîya komelî têra cîya nîyê û wina vat: “Heta ke aştî nêbo, kede azad nêbena, heta ke demokrasî nêbo têduştî û edalet bi ca nêyenê.”
‘Proses do seba şaran berê cuyêka azade akero’
Behçet Barût ard ziwan ke vera polîtîkayanê şerî prosesê Aştî û Komelê Demokratîk seba têkoşînê kede, azadîya cinîyan û ekolojîk zemînêke hemparê û vat: “Proses tena çareserîya meseleya kurdî nîyo, sewbîna eşkeno Tirkîya de seba şaran berê cuyêka azade û têduşte akero.”
Vengdayîşê tewrbîyayene
Behçet Barût seba mîtîngê 1ê Gulane yê Meydana Îstasyone de bêro viraştene vengdayîşê kerd û dîyar kerd ke do waştişê serê kede, aştî û edaletî waran de bêro berzkerdene.
