Roja destpêkerdişê şerê mabênê Amerîka-Îsraîlî û Îranî de heta demê adirbestî Başûrê Kurdîstanî de 20 pêşmerge û welatijan sivîlî yê Başûr û Rojhelatê Kurdîstanî şehîd bîyê. Sewbîna leşkerêke Fransî zî cuya xo ra bî û zêdeyî 100 kesî zî birîndar bîyê.
Roja 28ê sibate de Amerîka bi hemkarîya Îsraîlî vera Îranî dest bi hêrişêke hîra kerd. Vera nê hêrişan Îranî zî bi drone û fuzeyan dest bi bombardumanê cayanê merkezî û warê stratejîk yê hemkaranê Îsraîl û Amerîka yê dorûverê û taybetî Rojhelatê Mîyanên kerd.
Taybetî Îran û grûbê girêdayê ey bê mabên bi dron û fuzeyan hêrişê Başûrê Kurdîstanî kerd ke tu eleqeyê ey şer ra nêbîyê û ne zî hetêke şerî bî.
Nê wextî de zêdeyî 800 hêriş serê Başûrê Kurdîstanî de ameyê kerdene ke tede 20 pêşmerge û welatijê sivîlî yê Başûr û Rojhelatê Kurdîstanî ra şehîd bîyê. Sewbîna zî leşkerêke Fransiz ame kiştene.
Detayê netîceyê hêrişan wina yê:
21ê çele rejîmê Îranî hêrişê merkezê Partîya Azadîya Kurdîstanî (PAK) yê nêzdîyê Şaristanê Hewlêrî kerdbî, hêriş de pêşmerge Muzafer Mihemed zade şehîd kewt.
4ê adare de rejîmê Îranî hêrişê kampê Partîya Azadîya Kurdîstanî (PAK) yê sînorê şaristanokê Dêgele yê Şaristanê Hewlêrî kerd û pêşmerge Celîl Reşîd şehîd bî, û 3 peşmergeyî zî birîndar bîyê.
7ê adare de rejîmê Îranî bi fuzeyan hêrişê kampa Zirguwez ke kewena sînorê şaristanê Silêmanî kerd û peşmergeyê Komeleya Şorişgeranê Zehmetkêşan ya Kurdîstanî Îsmaîl Rehîm şehîd bî.
Reyna 7ê adare de bi fuzeyan hêrişê Teyaragehê Hewlêrî ame kerdene û karmendê asayîşî teyaragehê Hewlêrî Welat Tahîr şehîd bî.
11ê adare de na rey bi dronan hêrişê kampê Zirguwez yê girêdayê Şaristanê Silêmanî ame kerdene. Nê hêrişî de pêşmergeyê Komeleya Şorişgeran ya Kurdîstanî Omed Weysî şehîd bî û çend pêşrgeyê bînî zî birîndar bîyê.
12ê adare de rejîmê Îranî merkezêke yê hempar yê Hêzanê Fransa û Pêşmergeyê Herêma Kurdîstanî ke kewenê sînorê Dewa Mela Qadir yê Hewlêrî hedef girewt. Hêriş de fermandarêke Fransa Fewca 7 Hêzê Koyî ra Arnaud Frion ame kiştene
13ê adare de rejîmê Îranî hêriş berd serê merkezê Sazmanî Xebat yê sînorê Berdereş ê girêdayê Hewlêrî. Sazmanî Xebat yew partîya Rojhelatê kurdîstanî ya. Netîceyê hêrişî de 2 pêşmergeyî bi nameyê Îqbal Salîh û Fexredîn Mûradî şehîd bîyî û 4 pêşmergeyî zî birîndar bîyê.
Sibeya 24ê adare de rejîmê Îranî bi di hêrişanê cîya bi fuzeyanê balîstîk hêrişê Kampê Firqeya 7 û Firqeya 5î yê Hêzanê Pêşmergeyê Herêma Kurdîstanî kerd û di netîceyê hêrişan de 6 pêşmergeyî şehîd bîyî û 30 pêşmergeyî xî birindar bîyî.
7ê nîsane de Wezaretê Pêşmerge yê Herêma Kurdîstanî eşkera kerd ke pêşmergeyê bi nameyê Weysî Axa serê Firqeya 5î yê bejayî Fermandarîya Cayê 1ê netîceyê hêrişê 24ê adare de birîndar bîbî şehîd bî.
Nîmeyê şewa 7ê nîsane rejîmê Îranî hêrişê keyeyêk yê dewa Zergezewî yê şaristanokê Dabaşanî yêkeweno sînorê Şaristanê Hewlêrî kerd û netîceyê hêrişî de cinî û camêrd Musa Enwer û Mijde Eshed şehîd bîyî, banê înan rijîya.
14ê nîsane de rejîmê Îranî hêrişê Sûrdaşî yê girêdayê Şaristanê Silêmanî kerd ke koçberê Rojhelatê Kurdîstanî tede ciwîyayene. Netîceyê hêrişî de pêşmergeya 20 serrî Xezal Mewlanî pêşmergeyêke yê Komeleya Zehmetkêşan ya Kurdîstanî bî şehîd kewte.
17ê nîsane de rejîmê Îranî bi fuzeyan hêrişê kampê Cêjnîkan û Balîsan ke kewena sînorê Hewlêrî kerd. Hêriş de 2 pêşmergeyê cinî yê bi nameyê Semîra Elayarî û Neda Mîrî, ciwano bi nameyê Şahîn Azerberîn ke yê endamê Partîya Demokrat ya Kurdîstanî yê Îranî bî şehîd bîyî.
