Şaristanê Wanî de heqê rayîrî ame zêdekerdene. Welatîyan nêrazîbîyayîşê xo mojna û vat ke ê êdî nêeşkenê keye ra vejîyê.
Wan de krîzê ekonomî her ke şino giranêr beno. Vera şerê Îranî zî her roje vayîya çîyan zêde beno. Na rey zî heqê rayîrî yê mîyanê şaristanî ame vaykerdene û sey mana zî vayîya mazotî ameye mojnayene. Komîsyonê Koordînasyonê Resî yê Şaredarîya Wanî ya Şaristanê Girdî (UKOME) kombîyayîşê xo yê peyêne de qerarê se ra 25 (%25) zemê rayîrî girewt. Goreyê lîsteya newa ke dolmîşan de ameya aliqnayene, vayîya ke verê cû 25 lîre bi, bi 33 lîreyan.
Wendekaran zî heta nika 15 lîre dayêne, labelê no zemo newe reyde ê do mîyanê şaristanî de 20 lîre, şaristan ra heta unîversîte zî 25 lîreyan bidê. Reyna heqê rayîrê qezayan zî bi eynî sewîye ame zêdekerdene.
Welatî razî nîyê
Welatîyê ke na rewşe ra nerazî yê, îfade kerd ke vaykerdişê vayîya wesayîtan reyde cuya rojane zaf çetin bîya. Welatîyan vat ke fîyetê mazotî rasterast tesîrê şîyayîş û ameyîşê mîyanê şaristanî keno û wina vat: “Rewşa karkeranê ke her roje seba kar dolmîşan şuxulnenê û wendekaranê ke her roje şinê mekteb, xirab a. Goreyê şert û mercanê cuya ma, no zem zaf o. Zaf reyî seba werd pereyê wendekaran nêmanenê. Reyna zaf kesî roje de hîrê-çar reyî şinê nêweşxane û no zemo newe barê înan zî giran kerd. Ma êdî nêeşkenê keye ra vejîyê.”
