Hemşaredarê Misircî Alî Riza Bîngol û Sadiye Aktîn dîyar kerd ke rîyê xemsarîya dezgehanê dewlete ra laser zerarêko gird da qeza û vat: “Gelekî şarê ma bê keye mend.”
Seba varanê zafî, Misirc de laser qewimîyaye. Awe kewte zereyê banan û zerar da zad û heywananê welatîyan. Hemşaredaran derheqê şewa bobelatî de nê agahîyî dayê ma.
‘Ma welatî bi kemçeyan xelesnayî’
Alî Riza Bîngolî da zanayene ke waştişê înan ê seba tedbîrî bêcewab mendî. Bîngolî vat: “Ma bi îtfaîye û kemçeyan merdimê xo xelesnayî. Merg çin o la heywanî telef bîyî. Şaredarîya Amedî zî ma rê hetkarî kerd. Eke dezgehanê dewlete (DSÎ û Rayîrê Bejayî) wezîfeyê xo bikerdêne, na bobelate nêbîyêne. Ma do seba tezmînatî reyna muracat bikî.”
‘Awe sey çemî herikîyayêne’
Sadiye Aktîn zî dîyar kerd ke laser her hîrê hetan ra sey çem herikîyaye mîyanê şaristanî. Aktîn wina vat: “Taxanê Sumer û Yenîmahalle de zerar zaf o. Banê kewtê binê herre. Ma komîsyonêk awan kerd û personelê ma banê şarî pak kerdê. Keyeyê yew qatî binê awe de mendî. Çi destê ma ra bêro, ma do seba şarê xo bikî.”
Aktîn peynî de vat ke xebatê tespîtkerdişê zerarî dewam kenî.
