Hemsereka Pêroyî ya DEM Partî Tulay Hatîmogullarî dîyar kerd ke seba aştîyêka domdare ganî qanûnî bêrê viraştene û vat: “La îqtîdar rewşêka winasîne de bi helwestêko tersonek têgêreno û prosesî erey fîneno. Eke gamî nêrê eştene, destê kesanê vera prosesî xurt beno.”
Hemsereka Pêroyî ya DEM Partî Tulay Hatîmogullari Meclîs de kombîyayîşê grûba partîya xo de qisey kerd û bale ante serê averşîyayîşanê ke rojevê de yê.
Tulay Hatîmogullari destpekê qiseykerdişê xo de vera destbendkerdişê endam û rayberanê partîyanê çepgir û rojnamegeran reaksîyon mojna û vat: “Vera partîyanê ke temsîlîyetê ma yê, operasyonê pelçiknayîşî dewam kenê. Ma naye qebul nêkenê. Nê prosesî de ke ma qalê aştî kenê, operasyonê bi hewayî nêyenê qebulkerdene û goreyê ruhê prosesî nîyê. Ma tîya ra reyna vanê; 1ê Gulane û waştişê karker û bindestan nêeşkeno bêro astengkerdene. Ganî kesê ke ameyê destbendkerdene bilez bêrê veradayene.”
Tulay Hatîmogullari bale ante mîtînganê vera talankerdişê xoza yê Gimgim û Kanîreşî ameyê viraştene ser o û vat: “Esra Işik a ke seba pawitişê xoza ameya girewtene, bilez bêra veradeyene. Ma xoverdayîşê şarê Gimgimî yê seba xozaya înan silam kenê û vanê heta peynî ma kîşta têkoşînê şima de yê.”
‘Karkerî seba heqanê xo waran de yê’
Tulay Hatîmogullari dîyar kerd ke bi hezaran karkerê serê karî semedê îhmalkarî patronan cuya xo ra benê û nê çî ardî ziwan: “Patron û dewlete heqanê cuye yê karkeran domdar nêkenê, emnîyetê înan bi ca nêane û naye ra zî karkerî serê karî de cuya xo ra benê. Merdena karkeran hûmarêka serê îstatîstîkan nîya. Nê mergî qeza nîyê, cînayet bi xo yê. Ma do vera kedwerîya serê karkeran heta peynî kişta karkeran de bê. Têkoşînê înan têkoşînê ma ya. Karkerî vera zulm, xizanî û mergî de seba waştşê xo waran de yê. Karkerê madenî yê Dorukî seba heqdestê xo grevê vêşanî de yê. Karkerî vanê heta ma heme heqê xo bi dest bifînê do têkoşînê xo bidomnê. Karkerî seba heqê xo çalakî de yê. Yenê destbendkerene, rastê hêriş û tedayê polîsan yenê. Ganî ne karker, ganî patronê ke heqê karkeran wenê berê destbendkerdene. Karkerî reaksîyon mojnenê Yildiz holdîngî ke heqê karkeran nêdano înan. Ma zî vengdayîşê înan kenê ke bilez heqê karkeran bidê. 23ê nîsane de gedeyê karkeran ê madenî cayêko şorê wendegeh ameyê çalakîya grevê vêşanî. Heto bin ra xeylê gedeyî nê sîstemî de bîyê karkerî. Ma zî tîya ra vanê; ne gedeyê karkeranê madenî û ne zî gedeyê ke kerdê karker, tena nîyê. Ma do sîstemêko ke têduştî û azadî pê ano û gedeyî bieşkê tede biciwîyê pîya awan bikerê.”
Tulay Hatîmogullari ard ziwan ke semedê krîzê ekonomî yê Tirkîya verê sermeyadar û îqtîdarî kewtê yewbînî û wina qiseykerd: “Seke ke rojnameyê Yenîşafakî Wezîrê Ekonomî Mehmet Şîmşek sucdar keno la ma vanê şima heme hemkarê na rewşe yê. Ma hetê şima nîyê ma hetê karkeran ê.”
‘Raya Colemêrg û Wanî hema zî nêameya akerdene’
Tulay Hatîmogullari bale ante serê rayîrê mabênê Colemêrg û Wanî de ke laser de rijîya bî û 18 rojî yo girewteya û wina qiseykerdişê xo dewam kerd: “Na seserre de têkilîya Colemêrg bi dinya ra ameya birnayîşî. Eke uca şaristanêke rojavayê Tirkîya bîyane do bilez bi ameyene viraştene. La rayedarê dewlete bêvengê. Welatijê Colemêrgî seba nêweşxanî şinê Wan. La semedê ke rayîr nêameya viraştene welatijî nêeşkenê şorê nêweşxane. Ma rayîr nêdanê ke xizmetê komelî de cîyakarî bêro kerdene. Ganî îqtîdar fek na cîyakarî ra verado û nê rayîrî virazo. Ma şarê xo yê Colemêrgî ra vanê; bi selametî bo û çalakîya hêzanê kede û demokrasî yê Wanî ke seba viraştişê rayîrî organîze kenê selam kenê.”
‘Seba aştîya komelkî serebûtê faîl nedîyar roşn bikerê’
Tulay Hatîmogullari dîyar kerd ke awankerdişê Komîteya Roşnkerdişê Serebûtanê Faîl Nedîyar muhîm o û wina vat: “Dosyayê sey dosyaya Gulîstan Doku, Rojîn Kabaîş, Rojwelat Kiymaz û xeylê hedîseyê bi nê hawayî ganî bêrê roşnkerdene. La ganî bi naye sînordar nêmanê. Heme kesê hedîseyê faîl nedîyar de ke serran ê 90î de ameyê vîndîkerdene, dosyayê sey yê Mehmet Sîncar, Hrant Dînk, Ugur Kaymaz, Ceylan Onkol û heme serebûtê bînî bêrê roşnkerdene û vîndîbîyayeyî bêrê vînayene. Dayîkê Aştî bi serran o seba gede û merdimanê xo yê ke bi hawayêko faîl nedîyar ameyê qetilkerdene çalakîyan de yê. Se beno wa bibo ganî na bêro roşnkerdene. Dosyayê Gulîstan Doku reyna zî şaşîya caardişê qeyûman dano mojnayene. Qeyûmê Dêrsimî nika seba hedîseyê qetilkerdişê Gulîstane yeno muhakemekerdene. Sewbîna zî qeyûmê Xelfetî Şeref Albayrak ame girewtene. Hinî zî bêro cigêrayene xeylê serebûte winayinî do vejîyê meydan. Sey DEM Partî ma vanê; Ganî binê banê Meclîsî de cigêrayîş bêro kerdene û heqîqet vejîyo meydan. Ganî komîsyonê cigêrayîşî û heqîqetî heme hedîseyanê faîl nedîyar bêrê roşnkerdene. Seba aştîya komelkî hedîseyê faîl nedîyar roşn bikerê. Bêvengî hemkarîya sucî ya. Ma tu wext nêbî hemkarê sucanê şima û ma do nêbê zî. Wa serebûtê faîl nedîyar bêrê roşkerdene.”
‘Hema zî şima hêvîyê çî yê ?’
Tulay Hatîmogullari îfade kerd ke vengdayîşê Aştî û Komelo Demokratîk rayîrêk newî vernîya Tirkîya de akerda û wina vat: “prosesê pêkewtiş û çareserî ke demêko derg dewam keno, nê prosesî de PKK’yî serê de xo fesix kerd û prosesê şerî qedêna. Seba aştî hewcedarî bi gamanê huqûqî est a. Ganî her çî serê zemînê huqûqî de bi ca bêro. La îqtîdar rewşa ke wina de bi helwestêke tersonek prosesî erey fîneno. Eke game nêro eştene destê kesanê vera prosesî xurt beno. Ma îqtîdarî ra vanê; şima ey kesê ke aştî nêwazenê nêvînenê ke senî seba game nêeştena şima kêfweş ê û vanê proses xetimîya yo. Averşîyayîşê Rojhelato Mîyanên meydan de yê. Mîyanê nê averşîyayaîşan de aştî hewcedarîyêka gird a. Ganî îqtîdar fek tespît û teyîdan ra verado û seba viraştişê qanûnan game bierzo. Ganî game bêo eştene ke nê welatî de aştîyêka bi rûmetê bi ca bêro. Çi beno wa bibo ma do komelî reyde aştî bi rêxistin bikerê. Na cografya de qetî do aştî ser bikewo. Seba aştî babeta bazarî nîya, babeta rûmetî ya. Bi vengdayîşê birêz Abdullah Ocalan ra PKK’yî fek têkoşînê çekdarî ra verada û wazeno tewrê sîyaseto demokratîk bibo. Gelo do ha se bikerê? Bi serran vatêne wa çekan veradê û wa tewrê sîyasetî bibê. Nika hêvîyê çîyê ? Viraştişê qanûnan do bibo bingeyê Komareka Demokratîk. Firsendêke tarîxî vernîya ma de yo. Ganî no firsend nêro berhevakerdene. Bawerî ma bi aştîyêka bi rûmete est a. Ma do seba aştîyêka bi rûmete xebatanê xo bidomnê. Seba no proses bi hawayêko serkewte bireso netîce sey DEM Partî çi destê ma ra bêro ma do bikerê. Ma do heta hetayî nê barî bigirê serê milê xo.”
Tulay Hatîmogullari peynî qiseykerdişê xo de derheqê 1ê Gulane Roşanê Karker û kedkaran ê Dinya de amebî kombîyayîşî grûba DEM Partî selam kerdî û dîyar kerd ke ey do waştişê karkeran parlamento û meydanan de bîyarê ziwan û vat ke do 1ê Gulane de waran de waştişê xo bîyarê ziwan.
