KCK’yî roja paştîdayîş û têkoşînê 1ê Gulane pîroz kerd û vengda heme kurdan û vat ke bi ruhê Newroze, şarê Tirkîya reyde pîya waranê 1ê Gulane pirr bikerê.
Hemserekîya Konseya Rayraberdişî ya KCK’yî eşkerayîya xo de vat: “Ma 1ê Gulane roja paştîdayîş û têkoşînê heme kedkaran, cinîyan, ciwanan û şaran pîroz kenê. Ma têkoşîna şarê xo vera modernîteya kapîtalîste û heme hêzanê tedakeran bi heyecanê 1ê Gulane selam kenê. Verê her çî şehîdanê 1ê Gulane yê 1977î û heme şehîdê ke 1ê Gulane resnayî nê rojan, bi minet û rêz anê vîrardene.”
KCK’yî vat ke ma kewenê 1ê Gulane ke Tirkîya û Vakurê Kurdîstan de mîyanê prosesê haştî û komelê demokratîkî dewam keno, Rojhelato Mîyanên zî mîyanê Şerê Dinya yê Hîrêyin de yo. Ame îfadekerdene ke ameyoxê Tirkîya û Kurdîstanî bi rewşa prosesê haştîye û Şerê Dinya yê Hîrêyinî girêdaye yo û tesîrê têkoşînê şarî dîyarker o.
KCK’yî dîyar kerd ke şarê kurdî êdî şarê 100 serran ra ver nîyo: “Bi têkoşînê xo yê 50 serranê peyênan, kurdî 4 parçeyanê Kurdîstan û teber ra resayî qewetêko muhîm ê sîyasî û komelkî. Reyna rastîyêka komelkî ya kurdan a rêxistinbîyaye est a.”
KCK’yî vat ke vengdayîşê 27ê Adare yê Rayber Apoyî bî çareserîya meseleya kurdî û demokratîkbîyayîşê Tirkîya: “Muxatebê nê vengdayîşî tena şarê kurd nîyo, eynî wext de şarê Tirkîya zî yo. Hêzanê demokrasîye yê Tirkîya de zî berpirsîyarîya xebate seba serkewtişê programê haştî û komelê demokratîkî est a.”
KCK’yî tekîd kerd ke 1ê Gulane yê 2026î ganî bibo platformê wayîrvejîyayîşê Vengdayîşê Haştî û Komelê Demokratîkî û eşkerakerdişê îradeyê têkoşînê hemparî.
KCK’yî peynî de vat: “Ma venga heme kurdan danê ke bi ruhê Newroze şarê Tirkîya reyde pîya waranê 1ê Gulane pirr bikerê û beyreqa têkoşînî ke caardişê sosyalîzmê komelê demokratîk temîn kena, akerê. Bijî Yek Gulan! Bijî wayûbiratîya şaran û têkoşînê înan o hempar! Bijî sosyalîzmê komelê demokratîkî!”
