Endamê Konseya Rayraberdişî ya KCK’yî Mustafa Karasuyî veng da seba wayîrvejîyayîşê mîrasê tarîxî yê 1ê Gulane û vat ke ganî na roje bi perspektîfê sosyalîzmê demokratîkî bêro ernayene.
Endamê Konseya Rayraberdişî ya KCK’yî Mustafa Karasuyî ANF’yî rê derheqê manaya tarîxî û sîyasî ya 1ê Gulane de erjnayîş kerd. Karasuyî tekîd kerd ke 1ê Gulane tena roja paştîdayîşê kedkaran ney, sey sembolê têkoşînê sosyalîzmî zî yo.
Karasuyî dîyar kerd ke 1ê Gulane tena rojêka hempare ya dinya ya: “1886î de polîsan hêriş kerd mîtîngê karkeran ê 1ê Gulane û 4 rayberê karkeran ameyî îdamkerdene. Enternasyonala 2. de 1ê Gulane sey Roja Kedkaranê Dinya ame qebûlkerdene. Hêzanê kapîtalîstan cehd kerd ke tedeyîyê 1ê Gulane bivurnê, la nêeşkayî ser bikewê.”
Tirkîya de 1 Gulane
Karasuyî vat ke Tirkîya de 1ê Gulane demê Osmanîyan ra ame pîrozkerdene û serranê 1960î mekteban de 1ê Gulane sey “roşanê wisarî” ame naskerdene. Karasuyî tecrubeyê xo yê kesane zî ANF’yî re pare kerd:
“Ma 1976 de waşt ke Ankara ra bi otobûsa karkeranê şaredarîye şêrê Îstabul, la wexto ke çekêk kewt destê polîsan, ma ameyî destbendkerdene. 1977 de ma kortêja Îstanbulî de ca girewt; wexto ke serekê DÎSK’î Kemal Turklerî qisey kerd, vengê çekan ame û bi se hezaran kesî kewtî pêser. 34 kedkar û roşnvîrî ameyî kiştene.” Karasuyî dîyar kerd ke gladyoya Tirkîya no qirkerdiş plan kerdbî seba ke averşîyayîşê hêzanê çep û karkeran bivindarno.
Kurdî û 1ê Gulane
Karasuyî vat ke serranê 1970î de Vakurê Kurdîstanî de zî 1ê Gulane ame pîrozkerdene û grûbê kurdan ê sey DDKD, Rêya Azadîye, Ala Rizgarî beşdar bîyêne: “Bi taybetî hereketê Apocîyan rolêko muhîm girewt seba ke 1ê Gulane mîyanê kurdan de hîna eşkera bibo. Sloganê ‘Bijî 1ê Gulane’ eşkera bî.”
Karasuyî peynî de veng da: “Kurdî 1ê Gulane yê 2026î her cayî de bi ruhê Newroze bi girseyî beşdar bibê û têkoşînê azadîye û demokrasîye yê Tirkîya rê qewet bidê. Eke şarê kurd û hêzanê demokrasîye yê Tirkîya wayîrê paradîgmaya Apoyî vejîyê, sîstemo bê demokrasî do bêro vîyarnayene û Tirkîyaya Demokratîke awan biba.”
